BAGHMARA: South Garo Hills a·jao Karonggre-oni Baghmara-ona dakanggipa National Highway (NH-217) ramako ta·rake tarichina, ia ramana ra·gipa a·ani tangka paisarangko gamchina aro Baghmara Civil Hospital-ko 100 bedded hospital dake chalaichina didienba Budbar salo, A·chik Holistic Awakening Movement (AHAM) Southern Zone, a·dokni Chief Minister-na memorandum-ko on·angaha.
Karonggre-oni Baghmara-ona dakanggipa NH-217 ramani bidingo janapatengon, ia ramara South Garo Hills a·jani manderangna mongsonggipa rama ong·a indiba a·dokko man·chengaonin ia ramako nichanggalengani a·sel South Garo Hills a·jani manderang, re·a doanio neng·nikanirangko chagrongna nangtokkuenga ine AHAM Southern Zone parakataha.
“Ia NH-217 ramako four lane dake tarina a·arangko ra·ahaoba, a·a nokgiparangnade two-lane ramani korosrangkosan gamna tik ka·aha. Ian kakket ong·bebea ong·ode Right to Fair Compensation and Transparency in Land Acquisition, Rehabilitation and Resettlement Act, 2013-ko pe·ani ong·enga aro a·a nokgiparangna namen noksan ong·enga,” ine AHAM-SZ-ni general secretary Dipsrang Ch Marak parakatenba, a·a nokgiparangna four lane-ni korosrangkon gamchina aro ia ramako ta·raken tarina a·bachengatchina, a·dokni Chief Minister-ko didiataha.
Baghmara Civil Hospital-ni bidingo janapatskaengon, ian South Garo Hills a·jao damsamangmang dongpagipa district civil hospital ong·a aro ia hospital-ko 100 bedded hospital dake chalaina miksonganirang donggenchimoba da·ode kam ka·giparang chu·ongkujaenga ine AHAM-SZ parakatenba, ia hospital-na nangchongmotenggipa doctor-rangko ta·raken rakkichina aro hospital-ni ICU, emergency, operation theatre, maternity, neonatal care unit-rangna chu·onga gita kam ka·giparangko rakkichina a·dok sorkariko didiataha.
