TURA: East Garo Hills a·jani Dawagre-o kulina tik ka·gipa Horticulture College-ko chalaichipkujaengani gimin Niksamso Garo Community Organisation (NGCO), a·dok sorkario sing·doataha.
NGCO-ni parakatani gitade, bilsignina skangan uamang, East Garo Hills a·jani Dawagre Horticulture College aro Polytechnic College-ko man·chape dingtang dingtang college-rangko chalaichipgija donengani gimin a·dok sorkarina sedoatahachim indiba da·alonan ia Horticulture College-ko chalaina gita maming ja·kurangko de·kujaenga.
“Indita chang sorkarina gisik ra·attaitaianiko on·ani ja·manba Dawagre Horticulture College-ko chalaichipkujaenga,” ine NGCO-ni dilgiparang parakataha.
Ia college-rangko salgro salaram jolni Tribal chatro chatrirangna chubata aro nambata gadangni lekka porako on·na miksonganiosa rikaha ine janapatengon, ia college-rangko chalaichipgija donaniara, Garo Hills-ni chadamberangna, a·gilsakni seng·aniko ra·anio dal·bea gimaani ong·enga ine NGCO-ni dilgiparang parakataha.
Ia Horticulture College-ko ta·raken kulichina jolo songdongenggipa manderang, sorkariko didiatahaoba da·alonan maming ja·kurangko de·chipkujaenga ine matnangatengon, iani bidingo ta·raken talataniko on·china aro ia college-ko kuligalgalchina gita NGCO dabiangaha.
