SHILLONG: Meghalaya a·doko niam gri koela bikotaniko champengchina gita a·dokni Congress dol, ma·mong sorkariko didiataha.
Iani bidingo kobor ra·timgipa manderang baksa agangrikengon, niam gri koela bikotanio a·dok sorkariba jak donga aro a·dokni manderangna sokangna nanggipa a·dokni tangka paisarangko cha·enga ine Congress dolni dilgipa Manuel Badwar matnangataha.
“Koelarangko bikotanichi a·dokde maming namgnikon man·jaenga aro niam gri koela bikotanio jak donggipa manderangsan man·e cha·tokenga,” ine Badwar aganaha.
Adita salrangna skang, East Jaintia Hills a·jao, Assam-ni mande saksa, niam gri koela bikotanio janggiko gimaatna nangtaiahani gimin Badwar, ia kattarangko aganaha.
Re·anggipa December jaoba, apsan a·jaon, koela a·damo boma goprete mande saksa sina nangaha ineba ua gisik ra·atpiltaianiko on·angaha.
“Ia manderang, a·ningni gamrangkosan bikotenga ong·ja indiba ia koelarangni tangka paisarangko an·tangtangni pocket-rangonasa sokatenga,” ine Congress dolni dilgipa aganaha.
Union minister-rang, Meghalaya a·dokona re·bajringenga ine janapatengon, a·doko niam gri koela bikotaniko ma·mong sorkari, gisiko nange chipatna nangchongmota ine Badwar didiataha.
Niam gri koela bikotengani a·sel a·dok, bang·en kajinarangko gimaatna nangenga ineba ua aganaha.
Badwar-ni aganani gitade, Meghalaya a·doko kajinarangko gile man·ani bewalan batna nangachim indiba da·o dipet kror 4000-mangsan ong·aienga.
Bilsiantian a·dok sorkari, gong kror 26,000-27,000-mangni gita koros ka·enga aro ma·mongni tangka paisarangosa pangchakbatenga ineba ua aganaha.
Bilo ong·enggipa manderangan namgijagipa kamko dakmesokenga ine matnangatengon, a·doko tangka paisa jakkalsretani agreengani a·selan manderangsa bilgriroroangskaenga ine Badwar aganaha.
Bilo ong·enggipa manderang, election-ni somoirangosa vote-rangko brena gita tangka paisarangko jakkalenga ineba ua aganaha.
