TURA: Ia chang National Voters Day-ara Robibar salosa ga·akengani gimin Meghalaya a·dokni gipin biaprango gitan West Garo Hills a·jani Dadenggre Civil Sub-Division-oba ia chang 16-gipa National Voters Day-ko Dadenggre-ni Multi Facility Centre-o maniangaha.
Ia chang National Voters Day-ko ‘My India, My Vote’ ine pangchakaniko done manienga aro ia salko manianio, Dadenggre Civil Sub-Division-ni Additional Deputy Commissioner (ADC) Rajkumar Hajong, tom·anio bak ra·giparangna aganprakengon, India a·songo voter ba dilgipako seokna bil donggipa mande sakprakni gamchataniko janapangenba, ia salara, voter-rangni daitoko gisik ra·ani sal ong·a ine parakangaha.
Dilgipako seokani bilara a·songni on·gimin bilmangmangsan ong·aija indiba a·songo songdongenggipa mande sakantini dakna nanggni kaman ong·a ineba ua aganaha.
Ia tom·anio, Dadenggre Civil Sub-Division-ni Assistant Commissioner Solomon J Syiem-ba jinmana aganprakengon, 2011 bilsionin India a·song gimikon January 25 tarikko National Voters Day ine manironga aro ia salara, Election Commission of India (ECI)-ni Foundation Day-ba ong·a ine talataniko on·angaha.
Voters Day-ko maniani bak gita ia tom·anio dingtangmancha Voters’ Pledge ba pu·ongiparangni ku·mikchetanikoba jinma dakangaha aro ja·mano, electoral roll-rango gital biming segatgipa chadamberangna official-rangni jakchi, Election Photo Identity Card (EPIC)-rangkoba sualataha.
Ia salko manianio, Dadenggre Sub-Division-ni nambatgipa Booth Level Officer-rangnaba certificate-rangko on·e mande ra·pilskaaniko dakangaha.
Iana skang, ia chang 16-gipa National Voters Day-ko maniani bak gita dingtangmancha ‘Run for Democracy’ ba jinma katsusaaniko ong·atangaha aro ia katsusaanio, me·asarangoni skanggipa boksisko Macmillan B Marak, gnigipako Inbirth G Marak aro gittamgipa boksisko Bethnar A Sangma man·aha. Me·chikrangni katsusaanio skanggipa boksisko Nokarik Ch Marak, gnigipako Lilitha A Sangma aro gittamgipa boksisko Nopanchi A Sangma man·angskaaha.
