TURA: Garo Hills Autonomous District Council (GHADC)-ni Wagesik constituency-o ‘me·mang’ project-rang bang·en donga ine South Garo Hills a·jani social activist Greneth M Sangma matnangatenba, ia project ba kamrangni bidingo sal 15-ni gisepon sandirokchina aro kamrangko matchotate on·china Wagesik constituency-ni MDC aro GHADC Civil Works-ni Executive Membor Nathawal S Marak-ko didiataha.
Sangma-ni MDC-na sedoatani gitade, Wagesik constituency-o ra·gatgipa MDC scheme-rangni gimin RTI ka·e sing·sandion, ia constituency-ni ning·o bang·en kamrangko ka·aha ine aganchakaniko on·aha indiba ia kamrangoni bang·batakon Wagesik constituency-o nikna man·kujaenga aro ia kamrangara lekkaosan chu·sokgipa ong·kuaienga.
“Songni manderangba ia project-rangko mesokna man·jaenga aro kam ka·aniko mesokna signboard-rangba dongja. Mitam project-rangnade gipin department-rangni photo-rangkosa on·chapaha,” ine Sangma parakatenba, ian manderangni tangka paisarangko dilgiparangni jakkalsretaniko mesokanisa ong·enga ine matnangataha.
Civil Works-ni EM in-charge ong·e uan (Nathawal), Garo Hills gimikni kamrangko nirokani ong·a ine janapatengon, “Ia kamrangko chu·sokatna man·jagenchimode aro Garo Hills-ni bang·bata biaprangon ‘me·mang’ project-rangkosa matchotatna on·enga ong·ode ian nang·ni kamo ka·dongna man·gijanikosa mesokenga,” ine Sangma, Wagesik constituency-ni MDC-na sedoatgipa chittio janapatenba, ia ‘me·mang’ project-rango jak donggipa manderangni kosako rakgipa ja·kurangko de·china dabiangaha.
Ia ‘me·mang’ project-rangko sal 15-ni gisepon sandiroke, kamni noksarang baksa matchotate on·na man·ja ong·ode dongimin niamo pangchake Wagesik MDC aro GHADC Civil Works-ni EM I/c-ni kosako kachario badi ka·doanggen ine Sangma mikrakataniko on·angaha.
