GH-ni e·ching aro holdiko MNREDA-ni breanichi game ge·e cha·giparangna namgni ong·a

SHILLONG: Garo Hills-o anaros, e·ching aro te·rik bagan dake cha·enggipa manderangko dakchakna gita Asian Development Bank (ADB)-ni dakchake on·enggipa Livelihood Enhancement Program through Renewable Energy Systems-ni ning·o Meghalaya Non-Conventional & Renewable Energy Development Agency (MNREDA), mongsonggipa kamrangko a·bachengataha aro ia program-ni bak gita Garo Hills-o e·ching aro holdirangko brena a·bachengatanichi, game ge·e cha·giparang namgnirangko man·na a·bachengaha.
E·ching aro holdirangko breanio, Garo Hills-o donggipa dam 23 songrangoni sak 600-mangni gita game ge·e cha·giparang bak ra·angaha aro game ge·e cha·giparangoniko metric ton 40-mangni gita e·ching aro holdirangko breangaha.
E·chingko kg-prako gong 40 ka·e aro holdiko gong 25 ka·e breenga aro ia e·chingrangko joltangtango donggipa company-rangan chimongna, salna aro katepnaba dakchakengani gimin game ge·e cha·giparangni korosrangko komiatnaba dakchakenga.
E·ching aro holdirangko Jodhpur-o donggipa Cultivator Natural Products company-ona, e·chingni toko bikotna gita ra·angaha.
Garo Hills-ni e·ching aro holdirangko MNREDA-ni bregopaniara Garo Hills-o game ge·e cha·giparangna mingsa chu·sokani gita ong·aha aro game ge·e cha·giparangna iandake bosturangko palna gita cholrangko on·na nangenga ine MNREDA-ni Director Joram Beda aganaha. Game ge·e cha·giparang, an·tangtangni game ge·e man·gipa bosturangko kraa damrango pale sim·e cha·na man·na gita sorkari, cholrangko on·na krenge kamko ka·enga ineba ua aganaha.
A·doko game ge·e cha·na cholrang bang·en donga ine janapatengon, an·tangtangna pangkamgipa janggi tangani cholrangko on·na gita game ge·e cha·giparangni ku·cholsan ong·e kamrangko ka·na nangani gimin MNREDA-ni official janapangaha.