TURA: Batanggimin bilsirango, West Garo Hills aro South West Garo Hills a·jani a·kawe jolrango manderangni jelbra jelsuaniko nirok sandianirang dongjahani a·selan, Bangladesh aro gipin biaprangoni manderang, niam gri napsrukbae songdong a·chatokeaha ine Kharkutta constituency-ni gitcham MDC Smith Momin parakatenba, ia jolrango niam gri songdong a·chaenggipa manderangko sandie a·rikgalna man·na gita ta·raken Special Identification Register (SIR)-ko a·bachengatchina Meghalaya sorkariko didiataha.
Momin-ni parakatani gitade, West aro South West Garo Hills a·jani a·kawe jolrango, Bangladesh aro gipin biaprangoni manderang, niam gri napsrukbae songdong a·chatokahani a·selan ia sal somoirango niam retirangko rakkianio neng·nikanirangko chagrongna nangan baksana a·ani bil, songsalo tom·tomani aro Tribal jolrangna on·gimin niam bidikrangko rakkianioba neng·nikanirangko man·na nangengaha.
Simarang gita niam gri napsrukbaenggipa manderangko BSF-ni rim·na man·gipa manderangni gimin janapatengon, “Re·anggipa 2025 bilsini July 14 tarikoba BSF dol, niam gri napsrukbaenggipa Bangladesh a·songni sak 26 manderangko, West Garo Hills a·jani sima sambaoniko rim·na man·aha aro iana skang, 2025 bilsini February 4 tariko sak 9 manderangko West Garo Hills a·jani simaoniko, March-ni 18 tariko sakgittamko ia apsan jolonikon rim·na man·aha. Official-rangni see rakkianiko parakani gitade, 2025 bilsini April aro July jani gisepon BSF dolni sipairang, Bangladesh a·songni sak 116 manderangko, Meghalaya a·dokni dingtang dingtang biaprangoniko rim·na man·aha,” ine Momin parakataha.
Meghalaya Land Transfer Act 1972-ni ning·o, niam gri Tribal-rangni a·arangko Tribal ong·gijagipa manderangna on·na ba ra·na bil dongjachim ine janapatengon, ia sal somoirango Garo Hills-ni a·kawe jolrango niam gri napsrukbae songdong a·chaenggipa manderangni batroroengani a·selan ia niamko bilgriatengaha ine Kharkutta-ni gitcham MDC parakataha.
Momin-ni parakatani gitade, niam gri songdong a·chaenggipa manderangko sandina gita a·doko dongsogimikn niamrangba donga aro ia niamrangara Citizenship Act 1955-ni ning·o tarigipa The Citizenship (Registration of Citizens and Issue of National Identity Cards) Rules, 2003, a·dokni manderangko chel·chakna gita dongimin Indian Constitution-ni Article 355 aro Tribal-rangni a·a aro bilrangko chel·chakna dongimin Sixth Schedule ong·a.
Special Identification Register-ko dakanichi, West aro South West Garo Hills a·jani a·kawe jolrango niam gri songdong a·chaenggipa manderangko sandina dakchakani ong·gen aro ian Tribal-rangna on·gimin a·ani bilrangko chel·chakaniba ong·gen ine Momin parakataha.
