Tura-o dal·begipa tom·bimonganiko ong·atna tik ka·a
TURA: Adita salrangna skang, Rajabala jolo donggipa Goalgaon songo so·otako man·gipa Dilseng M Sangma sagini nokdangna kakket bichalko aro dingtangmancha tangka paisani gita dakchakanirangko on·china gita dabie, Garo Hills-ni dingtang dingtang dolrang aro songsalna kam ka·enggipa manderang, Tura-o tom·aniko ong·atangaha.
Ia tom·anio dingtang dingtang dolrang aro dilgiparang, tom·e chanchirimengon, sianggipa mandeni nokdangna CM’s Special Fund-oniko lak 50 aro Garo Hills Autonomous District Council (GHADC)-oniko lak 50 gamchina dabina tik ka·angaha aro ia tangka paisarangko, sianggipa mandeni nokdangna gamja ong·ode uamang, Tura-o dal·begipa tom·bimonge re·jomaniko ong·atna tik ka·aha ine ADIL dolni president Francis C Marak parakataha.
Ia tom·aniko ong·atani bidingo AAYF-ni president Salsam Marak-ba talataniko on·angengon, da·o ong·atna sienggipa GHADC election-o Tribal ong·gijagipa manderangna party tikiko on·jachina dingtang dingtang political dolrangko didina tik ka·angaha ine parakataha. Je party-an ia didianiko knachakja, uandakgipa party-ni kosako NGO-rang, rakgipa ja·kurangko de·na tik ka·aha ineba Marak parakataha.
Ia tom·anio dingtangmancha dingtang dingtang NGO-rangni membor-rang baksa Joint Action Committee-ko songaha ineba dilgiparang parakataha.
NGO-rangni parakatani gitade, ia committee-an, sianggipa mandeni nokdangna sorkari, dakchakanirangko on·engama on·jaenga, uarangko nirokanggen.
Dilseng Sangma-ko so·otanio jak donggipa pilak manderangkon, February jani gisepon rim·china gitaba NGO-rang, sorkarina somoiko on·angaha.
