SHILLONG: Drugs ba pekatgipa samrangko jegalchina aro name janggi tangchina a·dokni chadambeskarangko didie, da·al January 26 tarikoni a·bachenge a·dokni dolsa chadamberang, Tura-oni Shillong-ona ja·achi re·jomangenga.
Ia re·jomaniko ‘Walking with Purpose’ ba ‘Miksongani gnang Re·jomani’ ine pangchakaniko done ong·atenga aro ia re·jomaniko Nongstoin gita West Garo Hills a·jaoni East Garo Hills a·jaona ong·ate, ia re·jomaniko February-ni 3 ba 4 tariko matchotatna miksongenga.
Ia re·jomaniko East Khasi Hills a·jani Welkin Stone Shadap, Ri Bhoi a·jani Kyrsoijingtip Ryntathiang aro Eastern West Khasi Hills-ni Bashaiphar Shylla dilenga.
Ia re·jomaniko ong·atani bidingo talataniko on·angengon, a·doko chadamberangni drug jakkalaniko aro skatang janggi tanganiko champengna miksonge ia re·jomaniko ong·atenga ine Shadap parakataha.
“Ian ia sal somoirango chadamberangni chagrongna nangenggipa neng·nikanirangna chingni aganchakani ong·enga. Chadamberang pekatgipa samrangko jakkale, an·tangtangko nosto ka·ani pal namgipa kamrangna gisik on·china chinga ia re·jomaniko ong·atanichi didina miksongenga,” ine ua aganaha.
Ia re·jomaniko ong·atanio dakchakanirangko on·engani gimin ua dingtangmancha sorkari department-rangko, skul-college-rangko aro bading chiwalgiparangkoba mittelpilangaha.
