BAGHMARA: Bilsi anti ong·atrongbaenga gitan ia bilsioba South Garo Hills-ni skotong songjinma Baghamara-o nitobegipa Simsang chirikam an·chengo salgnina ong·atenggipa Tyisam Festival-ko a·dokni Tourism Minister Timothy D Shira Butbaro a·bachengate on·angaha jeon local MLA Kartush R Marak aro gipinrangba dongpaa
Salgnina ong·atenggipa Tysam Festival-ko a·bachengate on·anganio Tourism Minister Timothy D Shira jinmana aganprakangengon, ia salgnina ong·atenggipa ia bilsini Tyisam Festival-o bak ra·na man·e an·tangni ku·si ong·ani kattarangko aganangaha aro ia Baghmara Simsang chiasm an·chengko nike mingsingbegipa Chennai-o donggipa Marina Beach-ko gisik ra·atpilaha. Indake ong·genchimoba ia jolni Baghmara-o donggipa an·cheng Marina Beach-ni an·chengna bate dal·bata ine Shira aganangaha.
Tourism-ko namdapatani bidingo aganangskaengon, tourist-rangko bang·batatna man·a gita joltango an·tangtangan Tourism-rangko tarina nanga mongsongbate Simsang chirikamo tourist-ni rotogipa biap ong·atna nanga jean joltangni economic-ko bariatna man·gen ine aganangenba Meghalaya a·dokni Tourism Department a·dok gimikon Tourism-ko namroro silroroatna kam ka·enga ine aganangaha aro je an·chingo man·enggipa cholrangko jakalchina South Garo Hills-ni manderangko didiangaha.
Indake ia event-o Pul mesokani, Me·su mesokani, git ring·susaani chroksusaani, jatni kal·susaani, Simsang chirikamo kal·ani aro an·tamo Garo Hills-o doka damanina aro ring·salanina mingsinggipa band-rang jedake North Wind, Rough Road aro joltangni band-rang ring·mesokanggen. Una agreba jattangni dakmesokanirang unbaksa joltangni song·a chanani aro rokomanti jaktangchi tarigimin bosturangko nikangna man·gen.
