Baghmara: Garo Hills Youth Solidarity (GHYS), Rongara Unit aro Nongalbibra Unit, district-o niamgri dongenggipa gipin jatrangko sandi-niroke watatpilchina dabie South West Garo Hills-ni Deputy Commissioner-na memorandum-ko on·aha.
Garo Hills Youth Solidarity (GHYS)’ Rongara aro Nongalbibra Units, South Garo Hills Meghalaya, district-o tom·tomaniko rakkina aro jatni bil-rengsiko rakkina gita niamgri songdongenggipa rorirangko sandi-nirokchina mol·molaha.
District-o niamgri songdongenggipa rorirangko jolni manderang rim·ani koborko man·simenga. Rim·a man·giparangoni mitamrangode pangchakgipa lekkarangan dongja. Uamangni ma·a-paa, atchu-ambirangni dongani lekkarangan dongja, indake ong·ode uamang maio pangchake district-o dongenga, ian jajrengani ong·a. A·dokni manderangni man·gnirangko uamang ra·seke katengasan ong·aija, a·dokni tom·tomaniko so·sojengjeng ka·giparang ong·a.
Uni gimin organisation, district administration-ko South Garo Hills-o niamgri dongenggipa rorirangko am·sandichina mol·molaha. India-ni Constitution-ni niamrango pangchake ja·kku de·na nangenga. Niamgri songdongenggiparangko sandie watatpilosa namgen ine agankuaha.
