SHILLONG: West Garo Hills-o, ISIS-K bobil dolni bimingo A·chikrangko ka·mikkenatani a·selko namedake sandirokchina gita A·dokni gitcham Cabinet Minister aro BJP dilgipa Alexander Laloo Hek Bristibaro A·dok Sorkariko didiaha.
A·doktangni manderangko ka·mikkenatpilaniara namen dal·begipa obosta ong·a ine aganengon, iako chone ra·na nangja aro ian bakan dingchike kam ka·na nanga ine BJP dilgipa AL Hek, A·dokni Home Department, Chief Minister, Home Minister, aro MDA sorkariko didiaha.
“Sorkari, iako che·em che·em dake sandina nangchongmota. Sandianiko dakengon, Ma·mong sorkari baksa bakrimna nangchongmota, aroba Meghalayani manderangko ka·mikkenatenggipa kam-kattarangko State Home Minister, bakbakan Union Home Ministry-na u·iatna nanga, jedakgipa kamrangan a·dokni manderangni ra·chakna man·gijagipa ong·a, Hek aganaha.
Unomitingo, kengokaniko gipatna jotton ka·aniko ba a·dokni bimingko ong·siatna jotton ka·aniko champengna Sorkari rakgipa ja·kurangko ga·na nanga ineba Hek didianiko on·aha.
ISIS-K dongnaba donga ine janganirangba dongengon, indakgipa a·kangani baditana kakket ong·gen ma·sija indiba simsake sandina nanga ine BJP dilgipa aganaha.
Indake badiaba manderang ba dolko rim·a man·ode uni kosako raken kam ja·ku de·na nanga, ua aganaha.
‘‘Indakgipa dolrangrangna an·chingni a·ao ba a·songo biap on·na nangja. Bebegita dongbebea ong·ode uamangko bon·kimitatna nanga,” unigimin Sorkari daito ra·enba iana raken kam ka·na nangchongmota ine Hek aganaha.
2027 bilsina skang West Garo Hills-ni a·kawe jol Phulbari, Rajabala, Tikrikilla, Selsellao songdonggipa A·chikrangko wate katchina gita ka·mikkenatani kattarangko seenba ISIS-K dolni Area Commander Aminur Islam minggipani soi donggipa poster-ko Turao tape donangahachim.
ISIS-K ni ka·mikkenataniko dingchike sandichina Hek sorkariko didia
Date:
Share post:
