SHILLONG: Meghalaya a·doko 108 Emergency Ambulance Service-ko chalaina gita cholrangko sandina a·dok sorkari, dingtangmancha consultant ba u·i-ma·sigipa manderangko songe donangaha.
Iani bidingo talataniko on·angengon, ia consultant-ni ku·pattianirangko man·ani ja·mansa a·dok sorkari, 108 Ammbulance Service-ko chalaiani bidingo chanchianggen ine a·dokni Health Minister Wailadmiki Shylla parakataha.
A·doko 108 ambulance-ko chalaienggipa GVK-EMRI-ko a·dok sorkari, 2022 bilsion bon·ataha aro untalan a·doko 108 Ambulance Service-ko chalaina gita sorkari, gital company-ko seokna man·kujaengachim.
Da·o dipet a·doko 108 Emergency Ambulance-rangko National Health Mission (NHM)-sa chalaisoskaenga.
Indake ong·engon da·o dipet a·dok sorkarini songe on·gipa consultant-ni agan-ku·pattie on·aniko sorkari sengkuenga aro agan-ku·pattie on·aniko man·ahaosa, a·doko 108 ambulance-rangko chalaina gita sorkari, company-ko seokanggen ine Health Minister parakataha.
Iana skang, Meghalaya EMRI Workers Union-ni ning·o kam ka·giparangba, 108 service-ko a·dok sorkarini ning·on jako ra·e chalaichina aro dormaharangko on·china dabiangtokahachim.
Indake ong·engon, a·doko sak 7000-mangni gita ASHA worker-rangni dabianirangko chu·sokate on·na a·dok sorkari ku·rachakaniko on·ani ja·man ASHA worker-rangni jingjengataniko dontongaha ineba Health Minister parakataha.
ASHA worker-rangni dabianirangko chu·sokatanio neng·nikanirang dongachim indiba ja·mano ASHA worker-rang baksa Health department-ni official-rang apsan chanchirimenba, neng·nikanirangko namatna man·aha ine Shylla parakataha.
Sorkarini miksonganirangko u·iatani ja·man ASHA worker-rang, an·tangtangni jingjengataniko dontongna ku·rachakaha ineba Health Minister parakataha.
108 Ambulance-ko chalaiani cholrangko sandina consultant-ko songa
Date:
Share post:
