TMA-ni music theory-ko pass ka·giparangna certificate-rangko suala

TURA: Re·anggipa bilsio, Tura Music Academy (TMA)-ni ong·atgipa Trinity College London-ni Music Theory porikkako seanio chu·sokgipa chatro chatrirangna Sonibar salo, Tura Bonepa-o donggipa Cariz-o certificate-rangko sualataha.
Certificate-rangko sualatna gita Tura Music Academy-ni program-ko ong·atanio, Meghalaya a·dok gimiko git ring·anina mingsing minggamgipa aro da·o Rough Road dolna git ring·enggipa Muz, mongsonggipa sokgipa ong·e bak ra·angaha aro unbaksana Garo Hills-o mingsinggipa actor-rang, chong·motan Jesse James R Marak aro Simon George S Marak-ba dongpae bak ra·angaha.
Ia program-ko ong·atani bidingo Tura Music Academy-ni Director Tengrang R Sangma, jinmana talataniko on·angengon, chatro chatrirangni doka dam·ani aro git ring·aniko skie ra·anio didianiko aro ka·dongbatataniko on·na miksonganio, ia program-ko ong·ataha ine parakataha.
TMA-o poraienggipa chatro chatrirangkol doka dam·ani aro git ring·anio nambatatna gita on·kange kamrangko ka·engani gimin aro dingtang dingtang cholrangchi on·giltokengani gimin ua dingtangmancha, ma·a paarangko, chatro chatrirangko aro skigiparangkoba mittelpilangaha.
Ia program-ko ong·atanio, mongsonggipa ong·e sokgipa Muz-ba jinmana aganprakengon, skangni somoirangode da·o gita doka dam·ani aro git ring·anirangko skie on·gipa skulrang dongpajae an·tangtangsa skie ra·na nangrongaia indiba da·ode namnamgipa music skulrang dongahani gimin chadamberang, doka dam·ani aro git ring·anirangko nambate skie ra·na cholrangko man·engaha ine ia cholrangko ra·china aro name skie ra·china ua chadamberangko didiangaha.
Ia program-ko ong·atanio chatro chatrirangoni saksa Alexier Cheangdo B Marak, knatobee piano-ko doke mesokangaha aro Tura Music Academy-o skie on·enggiparangoni saksa Brorim M Marak-ba knatobee guitar-ko doke mesokangskaaha.
Music Theory porikkako pass ka·gipa chatro chatrirangna dingtangmancha sokgiparangni jakchi certificate-rangko sualataha aro bon·kamao skigiparangoni saksa Breackin Hill M Marak, mittelpilani kattarangko agane program-ko matchotataha.