‘Janggi grigipa’ budget ine Opp Cong matnanga
NEW DELHI: Ia 2026 bilsini Central Budget-o Development of North Eastern Region (DoNER) Ministry-na gong kror 6812.30-ko ma·mong sorkari chamataha aro uandaken, re·anggipa 2025 bilsio chamgipa gong kror 5.915-na adita batangaha. 2025 bilsio DoNER Ministry-na chamgipa gong kror 5915-oni gong kror 4,479-ko koros ka·ahachim.
Ia bilsini budget-na bading chiwalgipa dolrangni gisepo brine aganchakanirangko nikna man·ahaon ia budget-ko Opposition Congress dol, ‘janggi grigipa’ budget ine matnangskaaha.
Ia budget-o mongsongbate chamako man·gipa scheme-rangara PM-DevINE scheme-na gong kror 2,300 aro uni ja·man North East Special Infrastructure Development Scheme (NESIDS)-na gong kror 2,500 ong·a.
Salgro salaram jolrangna tangka paisarangko chamanio North Eastern Council (NEC)-ni project-rangan mongsonggipa ong·engkua indiba mongsongbatgipa kamrangde chi, bijoli aro rama jal·langrangko tarianian ong·enga.
Ia chang salgro salaram jolna chamgipa gital scheme-de Arunachal Pradesh, Sikkim, Assam, Manipur, Mizoram, aro Tripura a·dokrango Buddhist circuit-rangko namdapatanian ong·skaenga.
Ia budget-o Varanasi-oni Siliguri-ona High-Speed Rail Corridor-ko tarinaba parakataha aro ian salgro salaramoni, a·songni salaram jolrangona songre songgabataniko ta·rakbatatna dakchakani ong·gnok.
Ia bilsini budget-ko mesokani on·angengon, India a·songni salgro salaram jolrangara Theravada aro Mahayana/Vajrayana-ni daka rikanirangko man·rikgipa jolrang gita ong·ani gimin salgro salaram jolrango donggipa Buddhist circuit-rangko namdapatna dingtangmancha scheme-ko ra·gatenga ine Union Finance Minister Nirmala Sitharaman parakataha.
Una agreba, salgro salaramni Assam aro Tripura a·dokrango man·gipa Agar bolrangoniko ma·manti bosturangko man·anio dakchakaniko on·na gita ma·mong sorkari tik ka·angaha.
