AMPATI: Ampati Civil Hospital-ni Primary Nutrition Rehabilitation Centre (PNRC) aro Chief Minister’s Safe Motherhood Scheme (CMSMS)-ko Sombar salo, South West Garo Hills a·jani Deputy Commissioner Anendya Raajsshre, kulie on·angaha.
Ia program-ko ong·atanio, Ampati Civil Hospital-ni Medical Superintendent, health official-rang, hospital-o kam ka·giparang, ASHA-rang aro gipinrangba dongpae bak ra·angtokaha.
Ia tom·anio, Ampati-ni DMCHO Dr Noreen Sangma, jinmana aganprakengon, Ampati Civil Hospital-o PNRC-ko kulianichi, Severe Acute Malnutrition (SAM) aro Moderate Acute Malnutrition (MAM) saa donggipa bi·sarangko be·en aro gisikni gita namrorona dakchakgen ine aganaha.
CMSMS Transit Home-ni bidingo talataniko on·angskaengon, ian an·o donggipa me·chikrang aro uamangni nokdangni manderangko nokchake, dongchakani aro cha·ani ringanirangko on·gipa ong·a ine Dr Sangma aganaha. Ia nokara, an·o donggipa me·chikrang, jemangni obostarangan namja aro jemangan chel·gipa biaprangoni ong·a, uandakgipa me·chikrangko, an·pakna antisa skangan dongchakna on·gipa biap ong·a ineba Dr Sangma talate on·aha.
Ia tom·anio, South West Garo Hills a·jani Deputy Commissioner-ba jinmana aganprakangengon, Ampati Civil Hospital-o PNRC aro Transit Home-ko kulianichi, an·o donggipa me·chikrangna aro bi·sarangna nambate nirok sandianiko on·na man·gen ine an·tangni ka·dongchakenganiko parakangaha.
Health department-o kam ka·giparangko, mongsongbate ASHA aro Anganwadi worker-rangni kamrangko mittelpilangengon, South West Garo Hills a·jao bi·sa bakgitchak aro an·o donggipa me·chikrangni sianiko komiatangkuna gita nambate kamko ka·angkuchina Deputy Commissioner didiangaha.
A·doko nambatsranggipa hospital-rangoni damsa ong·atna Ampati Civil Hospital-na district administration-ni gita pilak nanga dakchakanirangko on·angkugen ineba ua ku·rachakaniko on·angaha.
Ia tom·anio jinmana aganprakanggipa gipin manderangara, Ampati Civil Hospital-ni Medical Superintendent Dr DG Momin, SDMHO Dr Lydia Marak aro gipinrang ong·a.
