MHRC-ni rai on·aniara rim·a man·gipa chadamberangko dosgri ine sakki ong·a: Bernard

SHILLONG: Rimpu Bagan case-o sak 15 manderangna dai gamchina gita Meghalaya Human Rights Commission (MHRC)-ni ge·etaniara, rim·a man·gipa chadamberangko dosgri ine mesokani ong·aha ine Tura-ni MDC aro BJP-ni state vice president Bernard N Marak parakataha.
Marak-ni parakatani gitade, 2022 bilsini July 22 tariko ong·gipa a·selni bidingo MHRC-ni sandiroke man·aniara, unsalo police-rangni chadrapaniara niamni a·palo ong·a aro police-rangni rim·gipa chadamberangara dosgrirangsa ong·a ine sakkiko mesokanian ong·aha.
Rim·a man·gipa chadamberang, kakket bichalna ka·dongbee dakgrikaha aro bon·kamao kakketan chegipa ong·aha ineba Marak parakataha.
MDA sorkario apsan bakrimenggipa dolrangan ong·engoba a·doko NPP-chi dilenggipa sorkari, BJP-ni dilgiparangko nisan ka·aha aro Rimpu Bagan-ko chadrapna jotton ka·anichi NPP sorkari, BJP-ni adita sak membor-rangko tol·gipa case-rangchi rim·na jotton ka·aha ineba BJP-ni state vice president matnangataha.
Dosgri chadamberangni kosako ka·gipa case-rang da·o seoka man·gipa dilgiparangon ga·akpilengaha indiba iarangko sriksrik dongnuna jotton ka·enga ineba Tura MDC parakataha.
Me·gong Festival-ko ong·atani bewalkoba ua raken jegalataha aro ian man·e cha·giparangna indin ong·ate, kangal cholgrirangoniko tangka ra·na ong·atgipa ‘chu festival’ gitasan ong·aia ine matnangataha.
Rim·a man·gipa chadamberangni kosako matnanganirangko da·o dosgri ine mesokaha aro MHRC-ni sandiroke man·anian ia case-ni bidingo talataniko ra·baaha ineba Marak parakataha.
Re·anggipa 2022 bilsini July 22 tariko, West Garo Hills a·jani Tura-o donggipa Rimpu Bagan-ko police-rangni chadrapanio, mandena on·gimin bilrangko pe·aha ine badi ka·dogipa manderangna daiko gamchina Meghalaya Human Rights Commission (MHRC), u·iataniko on·angahachim.
Commission-ni u·iatani gitade, Rimpu Bagan-ko police-rangni chadrape rim·gipa manderangni ming 30 case-rangko MHRC segataha indiba ia ming 30 case-rangoni ming 15-kode badi ka·gipa manderangan ra·pilaha.
Indake ong·engon, bangki ming 15 case-rangko MHRC-ni gita sandirokenba dolgnionikon knatime ra·ani ja·man, ia 2026 bilsini January 29 tariko, Commission-ni bon·kamgipa raiko on·angaha.
Iani bidingo MHRC-ni gita Meghalaya sorkarini ning·o donggipa Home (Police) Department-ni Principal Secretary-na sedoatengon, Rimpu Bagan-ko chadrapanio mandena on·gimin bilrangko pe·ahani gimin badi ka·gipa sak 15 manderangnan gong 50,000 ka·e daiko gamchina recommendation ba ku·pattianiko on·angaha.
Ia ku·pattianiko MHRC, Protection of Human Rights Act 1993-ni Section 18(e)-o pangchake on·angaha.