Raja Raghuvanshi-ko so·otanio sakkirang dongjae koidi sakgniko watpila

SHILLONG: Indore songjinmao bading chiwale cha·gipa Raja Raghuvanshi-ko Sohra jolo ka·saninggija dake so·otanina rim·ako man·gipa koidi sakgnini kosako chu·onga gita sakkirangko man·jae, sakgnikode watpilaha.
Raja Raghuvanshi-ko so·otanio, sakkirangko kimitani gimin rim·ako man·gipa Balbir Ahirwar aro Lokendra Singh Tomar-ni kosako bon·kamgipa investigation report-ko on·ani ja·man jakgitel wataha ine Mongolbar salo police-rang parakataha. Ia koidi sakgnina, re·anggipa bilsini July jaoba a·dokni kachari, jaminko on·ahachim.
Iani bidingo sing·sandiaton, Raja Raghuvanshi-ko so·otani bidingo sandirokchengmiting somoirango obostani kri aro sandirokanio man·ani kri ia mande sakgniko rim·ahachim ine East Khasi Hills a·jani SP Vivek Syiem parakataha.
Indake ong·genchimoba, ia manderango sing·sandiangkuon, uamangni kosako matnanganirangna maming sakkirangko man·dapjaha ine SP parakataha.
Ia case-na police-rang, ua somoioni gnigipa chargesheet-ko ka·aha.
Sakkirangko nisie galanina rim·ako man·gipa sakgittam manderangoni, gam-jinrangko chalaienggipa Silome James-kode charge sheet ka·aha aro da·o uko kachari bichal ka·angkugen.
Police-rangni u·iatani gitade, James Silome, ia case-o matnanga man·gipa Vishal Singh Chauhan-na Indore songjinmao nok para on·ahachim.
Ia sakgittam manderangko Special Investigation Team (SIT), re·anggipa bilsini June 26 tariko Madhya Pradesh a·dokoniko rim·enba Shillong-ona rim·baahachim.
Indake ong·engon, Raja Raghuvanshi-ko so·otanina matnangako man·giparangoni mongsonggipa Sonam Raghuvanshi-kode judicial custody-o donkuengpiti. Uni jaminna dorgasto galakoba kachari jegalatahachim.