SHILLONG: Tura Medical College-o kam ka·nagipa aro skie on·nagipa manderangko da·o ra·na a·bachengengahani gimin mikkang bilsionide class-rangko a·bachengani cholrang donga ine sorkari parakataha.
Iani bidingo kobor ra·timgiparangna u·iatengon, Tura Medical College-na skigiparangko aro kam ka·giparangko ra·na a·bachengengahani gimin da·o changgipin academic session-onide a·bachengna man·naba dongaha ine Mongolbar salo, a·dokni Health Minister Wailadmiki Shylla parakataha.
Health Minister-ni parakatani gitade, Tura Medical College-ko rikani kamrangba matchotangengaha aro kam ka·giparangkoba kamo ra·na a·bachengaha.
“Tura Medical College-na chinga skigiparangko kamo ra·na a·bachengaha aro kamrang seng·gnang matchotgenchimode class-rangko mikkang bilsioni a·bachengna man·gnok,” ine Shylla, kobor ra·timgiparangna aganaha.
Medical college-o skie on·nagipa doctor-rang chu·ongjaengani a·sel Tura Medical College-na skigiparangko ra·anio sorkari neng·nikanirangko chagrongna nangenga ine adita salrangna skangsan Health Minister parakatahachim.
“Medical college-ko a·bachengatanio neng·nikanide kam ka·giparang, mongsongbate college-o skie on·nagipa doctor-rangsa ong·enga. Ian chingna dal·begipa ra·biani ong·enga. Chinga raken kamkode ka·enga indiba skie on·giparangko chinga badita sak man·gen, unosa pangchakaignok,” ine Shylla aganaha.
Indake ong·engon, Tura Medical College-ko Public-Private Partnership (PPP) bewalo chalaina miksonganiko sorkari donpilaha aro da·o ia college-ko sorkari college daken chalaina re·mikkangengaha ineba Shylla parakattaiaha.
Tura Medical College-ko PPP mode-o chalaigenchim ong·ode college-o poraina sienggipa chatro chatrirang, bang·a fee-rangko gamna nange neng·nikanirangko chagrongna nanggen aro hospital-o sanna bananirangko ra·enggipa manderangba bang·en koros ong·gen ine kenchakenba, ia medical college-ko PPP mode-o sorkarini chalaina tik ka·aniko Garo Hills-ni dingtang dingtang dolrang aro jolni manderangba raken jegaltokengachim ine nikna man·a.
