SHILLONG: India sorkarini, Micro, Small and Medium Enterprises Ministry-ni ning·o donggipa Raising & Accelerating MSME Performance (RAMP) Scheme-ni ning·o, Meghalaya sorkarini Commerce & Industries Department aro Federation of Indian Export Organisations (FIEO)-ni nangrime salgnina ong·atenggipa Reverse Buyer-Seller Meet (RBSM) 2026-ko Mongolbar salo, Shillong songjinmani State Convention Centre-o a·bachengataha.
Ia RBSM-ko a·dokni MSME-rang aro bading chiwalgiparangna dingtang dingtang cholrangko on·na miksonganio ong·atenga aro ia program-ko a·bachengatanio, a·dokni Chief Minister Conrad K Sangma, Deputy Chief Minister aro Commerce & Industries Minister Sniawbhalang Dhar, Chief Secretary Dr Shakil P Ahammed, sorkari official-rang, FIEO-ni official-rang, dam 16 a·songrangoni bregiparang aro a·doktangni MSME-rangba bak ra·angaha.
Ia tom·anio a·dokni Chief Minister Conrad K Sangma, jinmana aganprakangengon, ia RBSM 2026-ko ong·atengani gimin Commerce & Industries Department-ko mittelpilangenba, ian Meghalaya a·doknasan ong·aigija salgro salaram jol gimiknan skanggipa changna ong·atani ong·enga ine parakataha.
RBSM-ko ong·atani bidingo talataniko on·angengon, iandakgipa program-rangko ong·atanichi a·dokni MSME-rangko aro bading chiwalgiparangko tang·doatna man·gen ine Chief Minister aganaha.
IFAD-ni ning·o chalaienggipa Meghalaya Livelihoods & Access to Markets Program (MLAMP)-ni bidingo janapatengon, project-ko chalaianio kamrang chu·ongnikani gita ong·jani gimin ia project-ko chipna miksonganirang dongachim indiba ja·mano krenge kamrangko ka·anichi da·o ia project-ko IFAD-ni nambatsranggipa project-rangoni mingsa ine a·gilsak gimikon ma·sitokaha ine Sangma aganaha.
Dingtang dingtang bosturangko taridapani namgnirangko janapatengon, niamrangko chu·sokatani ja·man anarosrangko dingtang dingtang biaprangona watna man·engaha aro self help group (SHG)-rangni holdi tarianirangba chu·sokna man·engaha ine Chief Minister aganaha.
Dingtang dingtang a·songrangoni bregiparang, a·doko game ge·e cha·giparang aro bading chiwalgiparang baksa mikkanggrik agangrikna cholko on·na miksonganiosa ia program-ko ong·ataha ineba Chief Minister parakataha.
Ia tom·anio a·dokni Deputy Chief Minister aro Commerce & Industries Minister Sniawbhalang Dhar-ba jinmana aganprakangengon, ia RBSM 2026-o dam 16 a·songrang, chong·motan South Africa, Zimbabwe, Slovakia, Turkiye, Nepal, New Zealand, Russia, Bahrain, Kenya, Australia, Uganda, Gambia, Azerbaijan, Sri Lanka, Canada, aro Romania a·songrangoni gimik sak 28 bregiparang bakko ra·enga aro a·dokni dingtang dingtang biaprangoni sak 100-na baten MSME badinggiparang bak ra·enga ine parakataha.
Ia RBSM-ko a·bachengatanio, MeghaRise Logo & Brand aro State Level MSME Portal-koba Chief Minister-ni jakchi a·bachengate on·angjolaha.
