SHILLONG: Bristibar pringo, East Jaintia Hils a·jani Thangsku jolo donggipa koela a·damo, rang·gitik gopretanichi sak 16 manderang siangna nangahani gimin a·songni Prime Minister Narendra Modi-ba kalimpaaniko parakataha.
A·sel ong·anio sianggipa manderangni nokdang ge·praknan gong lak 2 tangkarangko on·na gitaba Prime Minister Modi parakataha.
“Meghalaya a·dokni East Jaintia Hills a·jao a·sel ong·aniko knasoe anga ka·a be·a. An·tangtangni ka·sagiminrangko gimaatgipa nokdang ge·antinan angni kalimpaaniko on·enga. A·sel ong·anio saknaa man·gipa manderangba ta·raken nampilchina angni ska aro bi·ani ong·a,” ine Prime Minister Modi, social media-o parakataha.
A·sel ong·anio sianggipa mande sakprakni nokdangrangna gong lak 2 ka·e Prime Minister’s National Relief Fund (PMNRF)-oniko on·na aro saknaa man·gipa mande sakprakna gong 50,000 ka·e on·na gitaba Prime Minister Modi parakataha.
Bristibar pringo, East Jaintia Hills a·jani Thangsku jolo donggipa koela a·damo rang·gitik gopretanichi, koela a·damo kam ka·enggipa manderangoni, komibeoba sak 16 manderang sina nangaha aro saksade saknaaniko man·na nangaha ine police-rang parakataha.
