Sianggipa mande sakprakni nokdangna lak 3 ka·e on·gen: CM
SHILLONG: Bristibar pringo, East Jaintia Hills a·jani Thangsko jolo donggipa Mynsyngat songni koela a·damo rang·san gopretanichi, koela a·damo kam ka·enggipa manderangoni komibeoba sak 18 manderang sina nangaha ine kobor on·aha.
Ia a·selni bidingo u·iataniko on·atengon, a·sel ong·gipa biaponiko da·o dipet sak 18 manderangni manggisiko man·aha aro kam ka·giparangoni saksade saknaanirangko man·aha ine East Jaintia Hills a·jani Superintendent of Police (SP) Vikash Kumar parakataha.
“Da·o dipet sak 18 manderangni manggisiko man·aha aro saksade saknaanirangko man·ahani gimin uko Sutnga PHC-oniko ja·mano Shillong-ona ra·angchina u·iataha,” ine Kumar aganaha.
A·sel ong·gipa biapo police-rangko dakchakna gita National Disaster Response Force (NDRF) aro State Disaster Response Force (SDRF)-ni sipairangkoba okamataha ineba SP parakataha.
Ia koela a·damo niam gri koelarangko bikotengani a·sel goprete, manderang bang·en sina nangaha ine chanchichiptokenga.
Ia a·selni bidingo da·o sandirokna a·bachengataha ineba Kumar parakataha.
Indake ong·engon, ia a·selna a·dokni Chief Minister Conrad K Sangma, an·tangni suk ong·gijaniko parakataha aro ia a·sel ong·anio sianggipa mande sakprakni nokdangrangna gong lak 3 ka·e ex-gratia-ko on·naba parakataha.
A·sel ong·anio sianggipa manderangni nokdangrangna ua an·tangni kalimpaanikoba parakataha aro ia a·selni bidingo sandirokna gita ge·etaniko on·ataha ine u·iataha.
Batanggimin somoirangoba East Jaintia Hills a·jani dingtang dingtang koela a·damrango, dynamite-rangko goprete koelarangko bikotani a·sel, koela bikotenggipa manderangoni bang·en sina nangahachim ine nikna man·a.
