SHILLONG: Garo Hills Autonomous District Council (GHADC) election-ko ong·atna gita da·o dipet sorkari, tarikrangko tik ka·kuja ine a·dokni Chief Minister Conrad K Sangma parakataha.
“GHADC election-ko ong·atna da·o dipet chinga tarikrangko tik ka·kuja indiba iana Cabinet memo-ko tariengaha. Da·o changgipin Cabinet tom·anio chinga tarikrangko tik ka·naba gnang,” ine Sangma aganaha.
GHADC-na dongimin term April jaon bon·na siengahani gimin una skangan election-ko ong·atna nangengahachim ine nikna man·a.
GHADC election-o gipin jatrangko, mongsongbate Tribal ong·gijagipa manderangko bak ra·na on·jachina dingtang dingtang dolrangni dabienggipani bidingo sing·anina aganchakaniko on·angengon, GHADC-ko man·chengaonin Non-Tribal-rangkoba electoral roll-rango segatahani gimin da·o dipet iako dingtangatna man·kujaenga ine Chief Minister aganaha.
“1952 bilsionin Non-Tribal-rangko segatgipa electoral roll-rangkosa jakkalkuengani gimin da·o dipet Tribal ong·gijagipa manderangni bak ra·aniko champengna man·kujawa,” ine Sangma aganaha.
GHADC election-o Tribal ong·gijagipa manderangni bak ra·aniko champengna gitade, dingtang dingtang dolrang aro manderang baksa bang·en chanchirimna nangkugen ineba ua aganaha.
Da·o GHADC election sepangahani gimin ia changode sorkari, apsan electoral roll-rangkon jakkalangkuna tik ka·aha ineba Chief Minister parakataha.
“Da·o election sepangengahani gimin chinga a·bachengo jakkalbaenggipa electoral roll-rangkon jakkalkuna tik ka·aha,” ine ua aganaha.
Iani bidingo name chanchirimchengani ja·man jinmani ra·chakahaosa, electoral roll-rangko gital dake taripiltaina man·gen ineba Chief Minister parakataha.
