Assam Paikan ramarango songregiparangna naljokaniko on·china, Assam CM-ko mol·molata

TURA: Adita salna skang Tura-oni Guwahati-ona Paikan gita songreanggipa gari bolsako Assam Goalpara District-ni Paikan dollong sepango ma·sina man·gijagipa manderangni ro·ong goao jak donggipa manderangko ta·raken am·sandie rim·china aro songregipa manderangna chelchakaniko on·china Garo Hills Autonomous District Council (GHADC)-ni Deputy CEM, Nikman Ch. Marak, Assam a·dokni skotong Minister Himanta Biswa Sarma-ko mol·molataha.
Marak-ni seatgipa chittio janapatani gitade, songregipa manderangko gate salangenggipa gari bolsako ma·sina man·gijagipa manderang ja·rikenba gari mikkangko ro·ong goaha, jeni a·selan gari glass nosto ong·ahachim aro songregiparangoni saknaa man·ahachim. Ia indakgipa a·sel ong·aniara Assam a·dokni dingtang dingtang bakrangona poraina, kam ka·na, sana-bananiko ra·na aro dingtang dingtang nanganirangna Paikan gita songregipa A·chik jatrangna kenbeani ong·a ine Marak aganaha.
Scheduled Tribe jatrangni kosako jinmani dal·gipa ramarango iandakgipa a·selrang ong·enganiara kajia golmal ong·atna miksongani ong·a. Unigimin India a·songni niamni ning·o chongipa jatrangna jakgitel ong·e re·rurana on·gimin gita chel·chakanirangko on·na nanga ine aganenba, Paikan jolo mongsongbate je ramakon A·chikrang songre songabatna jakalengachim ua biaprango ta·raken chu·onga gita police dolrangko dona nanga aro chelchakanirangko on·a nanga, a·sel ong·anio dosi donggipa manderangko ta·raken sandie rim·na nanga, mikkangchi iandakgipa a·selrang ong·taijana gita chel·chakaniko aro name nirokaniko dakna nanga aro A·chik manderangni Assam-ona songreanganio naljokaniko man·a gita district administration aro police dolrangna u·iataniko on·china ine Dy, CEM Nikman Ch Marak Assam-ni Chief Minister Himanta Biswa Sarma-ko mol·molataha.
Una agreba A·chik jatrangde pangnan tom·tomaniko rakkigipa aro pilak jatrangkon mande ra·grikgipa ong·a. Badiaba dol ba saoba meli-nangrime donganiko kajia golmal ong·atna jotton ka·engode uamangni kosako a·dok sorkari ta·raken kam ka·a ineba Marak agandapaha