SHILLONG: Batanggimin Bristibaro East Jaintia Hills a·jani Umpleng Police Out Post-ni ning·o ga·akgipa Thangsko jolni Mynsyngat-o niamgri koela bikotenggipa a·damo Dynamite goprete bang·a manderangni siani ja·man Voice of the People Party (VPP)-ni dilgipa Ardent Miller Basaiawmoit, a·dokni skotong minister Conrad K Sangmako Chief Minister-ni biapko watchina gita dabiaha. Niam gri koela bikotongenggipa a·damo gopretani a·selo sak 25 manderangni janggirang mangkimmatako man·aha aro adita manderang saknaa man·tokaha.
Niamgri koela bikotenganichi iandakgipa signigipa a·selrang ong·taitaienganiara sorkariko chalaina changgijani a·sel ong·enga ine VPP-ni President, sorkariko jaksi ote aganaha, unigimin Chief Minister biaptangko watna nanga aro an·tangni daito gnanganiko ku·rachakna nanga ine aganaha. “Changni chang koela a·damo iandakgipa a·selrang ong·e manderangni janggirang gimaatako man·engon, maidake Chief Minister a·doko dilkugen” ineba sing·doangaha. Indake niamgri koela bikotaniko champengjani a·sel batanggimin bilsi-salrangonin badita manderang uamangni janggirangko gimaataha ineba VPP dilgipa aganaha.
Re·anggipa Bristibaro a·sel ong·aniara, batanggimin somoio Ksan-o koela a·kolo chi gapdoe a·sel ong·aming maming dingtangani gri, aro bang·a koela a·damrangon iandakgipa a·sel-apotrang ong·aha ineba Basaiawmoit aganaha. Ia a·selrangna sorkariko matnangatengon, compensation-ko on·aniara maming miksongagri, mande simanjok iara mai gisik gnangani? sigimin mandeko tangkachi re·baatpilna man·jawa, ua aganaha.
Iandake mande sidame a·sel ong·aniko raken jegalata baksa niamgri bikotenggipa koela a·kolrangko a·dok gimikonikon sandie chipatchina aro a·sel ong·anio jak donggipa gimikkon rim·china a·dokni Bharatiya Janata Party (BJP)-ni dolni kobor ku·wattimgipa Mariahom Kharkrang aganaha. Unbaksana a·sel ong·anio sianggipa manderangna aro uamangni nokdangrangna kalimpaaniko parakangan baksa sianggipa mande sakprakni nokdangrangna gong Lak 2 prak dake tangka paisarangko on·a ku·chakatanina Prime Minister Narendra Modi-koba Kharkrang mittelataha.
