SHILLONG: NPP-ni national president aro Chief Minister Conrad K. Sangma, Sonibar salo Garobadha-o tom·aniko ong·atao dingtang dingtang political party-rangoni sak 300 baten memborrang NPP-ona napanggiparangko rimchaksoe, ‘NPP salni sal bilakbatroroenga’ ine aganaha.
Gipin dolrangoni NPP-ona re·baaniara, party-ni pangchakaniko bilakdapatgen. NPP, pangnan a·doko songdongenggipa manderangni namgnina kam ka·a aro mikkangchiba a·dokni namgnina, namroro-silroroanina dangdike on·angkugen ine CM agankuaha.
Party-ona napgipa gital memborrang, party-ni a·dokni namgnina kam ka·na re·mikkanganiko bilakdapatgen ine agane gital memborrangko CM kusi ong·bee rimchaksoaha. Aro ian council poll-o party-ni tarisoaniko bilakdapatgen ineba aganaha.
