TURA: West Garo Hills a·jani Rajabala jolo donggipa Goalgaon songo, so·otako man·gipa ACHIK dolni membor Dilseng M Sangma sagini nokdangna sorkarini gita maming dakchakanirangko on·kujaengani gimin dingtang dingtang dolrang aro manderangni matnanganirangko man·ani ja·man sianggipa mandeni nokdangna a·dok sorkari, gong lak 3 tangkarangko on·angaha.
Ia tangkarangko, West Garo Hills a·jani District Administration official-rang, Chief Minister’s Special Grant-oniko sianggipa mandeni nokdangna on·eaha.
“Duko ga·akenggipa nokdangna chinga chingni kalimpaaniko on·enga. An·ching ka·sagiparangko gimaatna nangon namen ka·a be·ani ong·a aro altua ong·ja. Ia dakchakanichi sianggipa mandeni nokdangna ka·dimeaniko ra·bachina,” ine a·dokni Chief Minister Conrad K Sangma, social media-o parakataha.
Re·anggipa January-ni 9 tarik salpaksakchibara, Rajabala jolo niam gri chalaienggipa ro·ong quarry-ko chipatna re·ange re·bapilengmiting somoio ACHIK dolni membor-rangko Goalgaon songo, dolsa manderang champengsoenba, ro·ong, rua, jompol aro uandakgipa silchidarerangchi chadrapsoaha aro ia manderangni chadrapanichi, ACHIK membor-rangoni saksa Dilseng M Sangma, rasong gribee so·otako man·na nangahachim.
Ia a·selna da·o dipet police-rang sak 10 manderangko rim·na man·ahachim.
Ia a·selni bidingo a·dokni Chief Minister, sianggipa mandena aro uni nokdangna maming kalimpaanirangko aro compensation-rangko on·na parakanirang dongkujaengani gimin dingtang dingtang dolrang aro manderangba matnangtokengachim.
Sianggipa mandeni nokdangna GHADC-ni gita gong lak 50 aro sorkarini gita lak 50-ko gamchina gitaba dingtang dingtang dolrang dabitokengachim.
