SHILLONG: Meghalaya a·dokni koela a·damrango niam gri koela bikotako dontongkujaskalde mikkangchiba apsan daken a·selrang ong·e, manderang sina nangkuaigen ine Justice (Retd) BP Katakey mikrakataniko on·angaha.
East Jaintia Hills a·jani Thangsko jolo donggipa koela a·damo niam gri koela bikotani a·sel, manderang bang·en sina nangahani gimin ua ia kattarangko aganaha.
A·sel ong·gipa biapko Justice Katakey an·tangba Sukrobar salo nina re·angaha aro ia jolrango niam gri koela bikotaniko champengna sorkari aro district official-rang maming ja·kurangko de·ja ong·ode, East Jaintia Hills a·jao mikkangchiba apsan dakgipa a·selrangko chagrongna nangkuaigen ine mikrakataniko on·angaha.
Niam gri koela bikotaniko sorkari aro district official-rangan champengjaenga ong·ode darangba champengna man·jawa ine janapatengon, ia apsan jolrangon batanggimin somoirangoba niam gri koela bikotani a·sel iandakgipa obostarangko chagrongna nangaha ine Justice Katakey aganaha.
Justice Katakey-ni parakatani gitade, ia apsan jolon batanggimin somoio, mande sakgni so·otako man·aha, uni ja·man saksa sitaiaha aro da·o ia a·sel ong·e, komibeoba sak 27 manderang sina nangaha.
East Jaintia Hills a·jani Deputy Commissioner aro Superintendent of Police (SP) baksa tom·e chanchirimna ua tarikko tik ka·e donmanaha aro ia tom·anio ua, koela a·damo gopretaniko talbate sing·sandie ra·gen ineba Justice Katakey parakataha.
Ia a·selni bidingo ua talbate report-ko ra·na nangnikenga ineba ua aganaha.
East Jaintia Hills a·jani koela a·damo iandakgipa a·sel ong·aniara a·dokni koela a·damrango niam gri koela bikotaniko parakani gita ong·taiaha.
Niam gri koela bikotako dontongjaode a·selrang ong·kuaigen: Justice Katakey
Date:
Share post:
