RONGARA: South Garo Hills a·jani Rongara songo, CERC scheme 2022-2023-ni ning·o World Bank-ni dakchakanichi suspension foot bridge ba ja·achi re·ani dolongko name tarijahani a·sel da·on nosto ong·na a·bachenge, dolong gita re·ruraenggiparangna, mongsongbate chatro chatrirangna kenchakna nangani ong·enga ine Garo Hills Youth Solidarity (GHYS) Rongara unit parakatenba, ia dolongko namgipa bosturangchi ta·raken taripiltaichina dabiangaha.
“Ia dolongara, songni manderangna, mongsongbate skulrangchi re·enggipa bi·sarang, jekai RMSA School Rongara, Rongara Government U.P. School, Rongara Dobakol L.P. School, Rongtotma L.P. School, aro Rongtotma Green Bale English School-ni chatro chatrirangna namen mongsonggipa re·a doani chol gita ong·engachim. Skulo poraienggipa bi·sarangsan ong·aigija, songni manderang, sagipa manderangkoba ia dolong gitan ra·rurana nangtokpaengachim,” ine GHYS janapatenba, ia dolongko rika matchota bakan nosto ong·na a·bachengpiltaiahani gimin ia songni manderangna aro skulrangchi re·enggipa bi·sarangna kenchakna nangani ong·enga ine parakataha.
Dolongko tarianio, bostu namgijako jakkale tariani a·selsa ian da·o nosto ong·na a·bachengengaha ineba GHYS matnangataha.
Songni nokni mongsonggipa dolongrangko name tarijaniara manderangni tangka paisarangko indin bon·atasan ong·jaenga indiba manderangni janggirangko kenchakna nangani ong·atenga ineba GHYS parakataha.
Indake ong·engon, ia dolongko namgipa bosturangchi ta·raken rikpiltaichina aro kamrangko name nirokchina gita GHYS dabiangaha.
Ia dabianiko knachakjagenchimode, kachario kakket bichalna doktikgen ineba GHYS mikrakataniko on·angaha.
