TURA: Garo Hills-ni a·kawe jolrango, Electoral Photo Identity Card (EPIC)-ko kingsana bate jakkalenba, dingtang dingtang biaprango pu·onrongani gimin ia jolrango voter list ba pu·ongiparangni bimingrangko name nipiltaichina gita Kharkutta-ni gitcham MDC Smith M Momin, Chief Election Commissioner (CEC)-na sedoataha.
Garo Hills-ni a·kawe jolrang, chong·motan South West Garo Hills a·jani Mahendraganj jolrangoni, West Garo Hills a·jani Tikrikilla jolrangona kingking, voter list-ko nipilna gita Special Intensive Revision-ko ong·atchina gitcham MDC, CEC-ko didiataha.
“Ia jolrangara sima ari jolrang ong·a aro ia jolrango, gipin biaprangoni napsrukbae, niam gri electoral roll-rango biming segataniko jolo songdongenggipa manderang, changni chang badi ka·doataha. Ia jolrango, mitam manderangde, Assam aro Meghalaya a·dok damgnion, electoral roll-rango biming donggiparang ong·enggen ine chanchichipanirangba donga aro ian election-ni kamrango nangchakeaniko ra·baenga,” ine Momin, CEC-na sedoatgipa chittio parakataha.
A·dok damgnio pu·onaniko champengna gita a·songo dongimin niamrang donga ine janapatengon, “Representation of the People Act 1950-ni Section 17-ni ning·o, mande saksa, constituency damsaona agre electoral roll-o biming dongna man·ja aro Section 18-ni ning·o, mande saksa, apsan constituency-o changgni dake biming segatna niam dongja. Ia Act-ni Section 31-ni ning·o, electoral roll-rango niam gri biming segatgiparangnade sastirangko janapaniba donga,” ine Kharkutta-ni gitcham MDC parakataha.
Garo Hills-ni a·kawe jolrango, bang·a manderangan Meghalaya aro Assam a·dok damgnion pu·onna man·enga ine nikna man·ani ja·man, bang·bata manderangni bimingrangkon electoral roll-rangoniko den·galahachim indiba da·onan ia jolrango EPIC kinggni ba kinggittam jakkalgiparang bang·en dongkuenga ine kobor on·aha.
“Electoral roll-rangko name rakkina gita Election Commission of India (ECI), Representation of the People Act 1950-ni ning·o electoral roll-rangko je somoioba special ba intensive revision dakchina ge·etna bil donga. Registration of Electoral Rules 1960-oba, sandirokchengani ja·man electoral roll-rangko nipiltaina, jegalna, kimite galna aro taridapna cholko on·a. Indian Constitution-ni Article 324-oba, electoral roll-rangko tarirna aro nirokna gita ECI-na chu·gimik bilko on·manaha,” ine Momin parakatenba, South West aro West Garo Hills a·jani a·kawe jolrango, Special Intensive Revision-ko dakna ge·etaniko on·china ECI-ko didiataha.
