B’desh-oni napsrukaniko sorkari dingtang dingtang cholrangchi champengenga: Tynsong

SHILLONG: Bangladesh a·songoni niam gri napsrukaniko champengna sorkari, dingtang dingtang cholrangko ra·gataha ine Mongolbar salo, a·dokni Deputy Chief Minister aro Home Minister Prestone Tynsong, Assembly-o aganaha.
Assembly-ni Budget Session-o Mawryngkneng-ni Voice of the People’s Party (VPP) MLA Heaving Stone Kharpran-ni sing·anirangna aganchakaniko on·angengon, gipin biaprangoni napsrukaniko champengna gita sorkari, dingtang dingtang cholrangko aro niamrangko ra·gataha ine Tynsong parakataha.
2021 bilsi intal, Bangladesh a·songoni niam gri napsrukbagipa sak 658 manderangko sandie pattokrangko donataha aro unoni sak 194 manderangkode, sastirang matchotani ja·man a·songtangona watpilataha ineba a·dokni Deputy Chief Minister parakataha.
Niam gri napsrukaniko champengna gita dam 18 anti-infiltration check post aro gate-rangko donataha ine janapatengon, a·dok damgnini simarango aro Indo-Bangla simarango Land Customs Station-rangkoba done, nirikkianirangko dakenga ine Tynsong parakataha.
“Ia check post-rangko pilak a·jarangondone Anti-Infiltration Special Squad-rang nirokenga aro uamang, Labour department, Village Defence Party (VDP)-rang aro songni dilgiparang baksa nangrime, simsakbatna nanggipa biaprango nirok sandianirangko dakjringenga,” ine Tynsong, Assembly-o aganaha.
Gipin a·songrangoni niam gri re·napbagipa manderangko sandie watatpilna gita sorkari, dol 11 District Task Force-rangko songaha ineba ua aganaha.
“2021 bilsioni ia 2026 bilsini February 3 tarikona kingking a·doko niam gri napsrukbagipa manderangko sandie sak 658 manderangko rim·na man·aha aro ia manderangna dongimin niamrango pangchake sastirangko on·aha. Ia somoini gisepo, Bangladesh a·songni sak 194 manderangko, sastirangko matchotani ja·man, Bangladesh Embassy-oniko Travel Permit-ko ra·e a·songtangona watpilataha,” ine Deputy Chief Minister aganaha.
East Khasi Hills a·jani mitam biaprango Meghalaya Residents Safety & Security Act (MRSSA) 2016-koba ra·gataha aro Immigration and Foreigners Act 2025, Bharatiya Nyaya Sanhita baksana Ministry of Home Affairs-ni niamrangkoba ja·rikenga ineba ua aganaha.