EJH-o koela a·kol gopretaniko kachari jako ra·aha ine Speaker jera ra·grikna on·ja

SHILLONG: Adita salrangna skang, East Jaintia Hills a·jani Mynsyngat-Thangsko jolo koela a·kol goprete a·sel ong·aniko Meghalaya High Court da·o jako ra·ahani gimin ia a·selni bidingo Assembly-ni Budget Session-o jera ra·grikaniara niamni a·palo ong·gen ine Mongolbar salo, Assembly-ni Speaker Thomas A Sangma parakataha.
Rule 57, sub-clause 6-o pangchake ua, East Jaintia Hills a·jani koela a·damo a·sel ong·aniko Assembly-o chanchirimna aro jera ra·grikna on·jawa ine Sangma parakataha.
“Ia a·selni bidingo kachari bichal ka·na jako ra·manaha ine anga u·iataniko man·soaha aro ia niamo pangchake anga an·tangni chanchiani gita ja·kuko de·aha. Ia a·selni bidingo Assembly-o chanchirimna aro jera ra·grikna on·na man·jawa,” ine Sangma aganenba, ia a·selni bidingo a·dokni Chief Minister-ba nanga gita ku·rangko on·aha ine parakataha.
Ia niamni bidingo Nongkrem-ni Voice of the People’s Party (VPP) MLA Ardent M Basaiawmoit janapatskaengon, ia a·selni bidingo sorkariko chalaienggiparang, jera ra·grikna sikjae, kachari jako ra·aha ingipa kattako jakkaltaitaienga ine matnangataha.
Nangchongmotgipa kamrangni bidingo seokako man·gipa dilgiparang ong·e chanchirimna aro ku·rang on·na bilrang donga ine janapatengon, kacharirang an·tangtangba, kamrang matchotgija dongaiani giminde dilgiparangni chanchirimaniko champenga ong·ja ine aganmanaha ine Basaiawmoit parakataha.
“Ia a·selo dosi donga dongja ba kacharini bichalrangni gimin an·ching chanchirimna man·ja beben, indiba iandakgipa a·selrangko champengna gita an·ching sorkarini chu·sokgijanirangkode chanchirimna man·a. Ia niamo pangchake sorkari, an·tangtangko dongnuchakna nangja,” ine VPP MLA aganaha.
East Jaintia Hills a·jani koela a·damo gopretaniko membor-rangna chanchirimna on·na nanga ineba Basaiamoit, Speaker-ko didiangaha.
“Maini a·sel ia koela a·kol gopretaha aro a·doko niam gri koelarangko bikotenggipani bidingo a·dokni manderang ma·sina nangniktokenga,” ine ua aganaha.
Basaiawmoit-ni didigipa kattarangna Opposition dolni dilgipa Mukul Sangma-ba chakpaaniko on·angengon, ian Assembly-o chanchirimna aro jera ra·grikna nanggipa kam ong·chongmota ine aganaha.
East Jaintia Hills a·jani koela a·kol goprete a·sel ong·aniko dingtang bichal ka·na gita sorkari, Meghalaya High Court-ko mol·molna nanga ineba Sangma aganaha.
Ia a·selni bidingo Opposition MLA-rang jera ra·grikna didiahaoba ia a·selni bidingo chanchirimna aro jera ra·grikna gita Assembly-ni Speaker on·skajaha.