SSA aro Adhoc skigiparangni dormahako bariatanichi kr 200 koros batgen: CM

SHILLONG: A·dokni SSA aro Adhoc skulrango skigiparangna April 1 tarik dipet gital dormahako on·na sorkari tarimanahani gimin bilsiprakon gong kror 200-ko koros ka·dapna nanggnok ine a·dokni Chief Minister Conrad K Sangma, Assembly-o parakataha.
Assembly-ni Budget Session-ko ong·atanio, a·dokni SSA aro Adhoc skulrango skigiparangna dormaharangko on·ani bidingo chanchirimanina agan-talatanirangko on·angengon, “SSA aro Adhoc-ni Lower Primary aro Upper Primary skulrango skigiparangna chinga kror 60 tangkarangko koros ka·rongachim aro da·o ia gadangni skigiparangna structured pay ba tarigimin dormahako on·na tik ka·ahani gimin chinga 3 percent-ko bariatenga,” ine Mongolbar salo, Chief Minister aganaha.
SSA aro Adhoc skulrango skigiparangna tarigimin dormahako on·anio sorkari, bilsiprakon kror 800 tangkarangko koros ka·gen ine janapatengon, sorkarini ia ja·kuko de·aniara skigiparangna dormahako tik ka·gimin gita on·ani ong·enga aro ian skigiparangni dormahako bariataniba ong·engani gimin skigiparangnaba rang·speaniko ra·bagnok ine Sangma aganaha.
Chief Minister-ni parakatani gitade, sorkarini ia ja·kuko de·anichi sak 23,007-na baten skigiparang namgniko man·gnok aro ia ja·kuko de·aniara rakbegipa kam ong·genchimoba skigiparangni namgnina ong·skaenga.
Salgro salaram jolrango Meghalaya a·dokni skulrangko chalaiani bewalan man·dikbatsranggipa ong·a ine janapatengon, a·doko bang·bata SSA aro Adhoc skulrangkon private management committee-rangchisa chalaia aro sorkarichi chalaigiparang ong·ja ine Chief Minister parakataha.
“Ia skulrangoni 90 percent-de private-chi chalaigipa skulrangsa ong·a aro sorkarichi chalaigipa skulrang ong·ja. Ia skulrangko chalaina man·na gita sorkari, uamangna tangka paisarangko dakchake on·skaengachim,” ine ua aganenba, iandake dakchake on·anioni ja·manode dormaharangko on·aniosa sokaha aro ja·mano skigiparangni chu·gimik dormaharangkon sorkari jako ra·gen ine ka·dongchakanirangba ong·katna a·bachengaha ine parakataha.
“Sorkari skulrangko chalaianide sorkarini daitoan ong·a indiba adhoc skulrangkode private management committee-rangsa chalaia. Indiba chinga skigiparangni neng·nikanirangko ma·sichake, ia ja·kuko de·aha,” ine Chief Minister aganaha.
Ia skulni skigiparangna dormaharangko on·anichi sorkari, jako ra·na miksonganirang dongama ine Opposition dolni dilgipa Mukul Sangma-ni sing·anina aganchakaniko on·angengon, “Chinga skulrangkode jako ra·na miksonganirang dongja indiba skigiparangni dabiani gitasa dormaharangko tarie on·enga,” ine Chief Minister aganaha.
Deficit skulrangni giminde sorkari ja·mano dingtang dake nipilanggen ineba ua ku·rachakaniko on·angaha.