1972 bilsini SRP-ko taridapjachina Expert Committee ku·pattia
SHILLONG: State Reservation Policy (SRP)-ko nipilna gita sorkarini songe on·gipa Expert Committee-ni report-ko Budbar salo a·dok sorkari, Assembly-ni Budget Session-o mesoke on·angaha.
A·dokni Reservation Policy-ko gital dake taripilchina dingtang dingtang dolrang dabiangani ja·man, ia bilsi 50 batgipa policy-ko nipilna, a·dokni dingtang dingtang biaprango, dingtang dingtang dolrang, kam ka·giparang, chatro chatrirang, skigiparang aro a·doko songdongenggipa manderang baksa chanchirimenba report-ko on·china gita ia Expert Committee-ko 2023 bilsini September jao a·dok sorkari songe on·ahachim.
Ia report-ko Expert Committee, re·anggipa 2025 bilsini June jaon sorkarina pakwate on·angaha aro ia report-ko ta·rake parakchina dingtang dingtang dolrang dabiangani ja·man a·dok sorkari, Budbar salo Assembly-ni budget session-o mesoke on·angaha.
Indake ong·engon, 1972 bilsini Reservation policy-ko taridapgija skango gitan apsan dake donangkuchina Expert Committee-ni report-o ku·pattianiko on·angaha indiba namdapatna nanganirangko namdapatskachina ku·pattianiko on·aha.
Reservation policy-de mande jelbra jelsuanio pangchakna man·jawa indiba songsalo aro lekka poranio ja·manchakani, itihasni gita cholrang donggijani aro kamrangko ka·anio chu·onga gita cholrang donggijanikosa nigrikna nanga ine Expert Committee-ni report-o janapaha.
Reservation ba kamna biaprangko kanganio toromrango pangchakna man·jawa ineba committee-ni report-o parakaha.
Reservation policy-ko skul, college aro uandakgipa institute-rango ja·rikani giminde a·dok sorkari, jakgitele cholrangko niangna man·gen ineba Expert Committee-ni report-o parakaha.
Meghalaya a·doko, mongsongbate Garo Hills-ni a·jarango manderangni janggi tangani gadangko tang·doatna aro kamna susaaniko namdapatna gita lekka porani gadangko tang·doatchina gitaba Expert Committee-ni report-o, a·dok sorkarina ku·pattianiko on·angaha.
SC, ST aro OBC gadangrangna Economically Weaker Section (EWS)-ni namgnirangko on·jachina gitaba Expert Committee-ni report-o ku·pattianiko on·angaha.
1972 Resolution-ni ning·o ‘carry forward’ provision ba niamko ja·rikangkuchina gita ku·pattianiko on·angengon, ‘carry forward’ period ba somoiko bilsisaoni bilsi gittamona ra·dodapatchina Expert Committee-ni report-o didiataha.
12.01.1972-o tarigipa Resolution-ko bilsi 50-na baten ja·rikbaengahani gimin ia apsan niamkon ja·rikangkuchina ku·pattiangengon, kamo ra·aniko nambate chu·sokatna reservation roster system-ko raken ja·rikchina aro maming dongnuani dongjachina Expert Committee-ni report-o ku·pattiangaha.
