TURA: February-ni 18 aro 19 tarikrango, Krishi Vigyan Kendra (KVK) South Garo Hills (SGH), ICAR National Innovations in Climate Resilient Agriculture (NICRA) Project-ni ning·o dingtangmancha Animal Health Camp-ko Chokpot C&RD Block ning·o donggipa Asugre aro Balwatgre songrango ong·atangaha.
Ia Animal Health Camp-ko ong·atanio, KVK-SGH-ni Principal Scientist aro Head Dr A Haribhushan-ni dilanichi KVK-ni Subject Matter Specialist (Livestock Production) Dr Rupam Bhattacharya, matchurangko tika su·angenba matchurangni dingtang dingtang sabisi sakanchirangni gimin songo noko jila kaanirangko dake cha·enggipa manderangna agan-talatanirangko on·angaha.
Ia salgnina ong·atanggipa Animal Health Camp-o mang 130-mangni gita matchurangna tikarangko su·angaha aro ia program-o song damgnionin bang·bea manderang bak ra·angtokaha.
