Phulbari-o niam gri chalaienggipa teer dokkanrangko chipatchina NGO-rang dabitaia

PHULBARI: West Garo Hills a·jani Phulbari jolrango niam gri teer dokkanrangko chalaienga ine adita salrangna skangan Phulbari jolni dingtang dingtang dolrang, chong·motan GSU, ADE, FKJGP, NGCO, AHAM, GOERA, FAF aro CEPARD dolrang badi ka·doatahaoba da·onan ia niam gri chalaienggipa teer dokkanrangko chipatkujaengani gimin ia dolrang, gital dake gisik ra·atpiltaianiko on·angaha.
NGO-rangni parakatani gitade, Phulbari jolrango bang·bata teer dokkanrangkon maming licence grisa chalaiengani gimin sorkarina kajinarangko gamna nangjaenga aro ian a·dokna gimaaniko ra·baani gita ong·enga.
Iani bidingo Phulbari jolni NGO-rang, re·anggipa January-ni 7 tarikon, West Garo Hills a·jani Superintendent of Police (SP)-na badi ka·doatenba, ia teer dokkanrangko chipatchina didiatahachim.
“Phulbari bazar, national highway aro badiaba badiaba biaprango bang·en teer dokkanrangko maming licence grisa chalaitokenga aro ia teer dokkanrang, Meghalaya Regulation of the Game of Arrow Shooting & Sale of Tickets Act-o on·gimin niamrangko pe·enga. Ia jolrango iandake niam gri teer dokkanrangko kuliani da·o batrorobaengani gimin ian ja·manchina kenchakna nanganiba ong·enga,” ine Phulbari jolni NGO-rang parakataha.
Iani bidingo jasana skangan uamang, West Garo Hills a·jani SP-na seachi badi ka·doatahachim ine janapatengon, “Niam gri chalaienggipa teer dokkanrangni kosako maming ja·kurangko de·chipjaengani a·sel da·o ia jolrango niam gri kuligipa teer dokkanrang batroroengaha,” ine NGO-rang parakataha.
Ia teer dokkanrangko police aro sorkari official-rang chipatjagenchimode uamang an·tangtangan chipna gita ja·kurangko de·chakatanggen ineba NGO-rang mikrakataniko on·angaha.
“Mikkangchiba sorkari official-rang aro police-rang, ia niam gri chalaienggipa teer dokkanrangko chipna gita maming ja·kurangko de·jagenchimode chinga an·tangtangan niam gri chalaienggipa teer dokkanrangko sandie chipatna draatako man·gen,” ine Phulbari-ni NGO-rang parakataha.