TURA: Adita salrangna skang, West Garo Hills a·jani Rajabala jolo donggipa Goalgaon songo, ACHIK dolni membor Dilseng M Sangma-ko so·otanina police-rang, Budbar walo mande sakgniko rim·dapna man·aha aro ia a·selna rim·ako man·giparang da·o gimik sak 15 gapengaha.
Police-rangni u·iatani gitade, ia a·sel ong·a intalan ia mande sakgni, police-rangoni kate dongengachim aro ia mande sakgniko West Garo Hills a·jani dolsa police-rang, East Khasi Hills a·jani Mawsynram songoniko rim·na man·aha.
Rim·ako man·gipa mande sakgniara, Bowabari songoni bilsi 43 ong·gipa Aminul Islam aro bilsi 45 ong·gipa Gazi Rahman ong·a ine police-rang u·iataha.
Re·anggipa January-ni 9 tarik salpaksakchibara, Rajabala jolo niam gri chalaienggipa ro·ong quarry-ko chipatna re·ange re·bapilengmiting somoio ACHIK dolni membor-rangko Goalgaon songo, dolsa manderang champengsoenba, ro·ong, rua, jompol aro uandakgipa silchidarerangchi chadrapsoaha aro ia manderangni chadrapanichi, ACHIK membor-rangoni saksa Dilseng M Sangma, rasong gribee so·otako man·na nangahachim.
