TURA: Onbatgipa gadangonin Congress dolko mangrakpilattaina gita miksonganio All India Congress Committee (AICC)-ni Observer Dr Bellaiah Naik Tejavath, Bristibar salo Garo Hills-ona sokbaaha aro ua Bristibar salonin Garo Hills-ni dingtang dingtang District Congress Committee (DCC) aro Block Congress Committee (BCC)-ni dilgiparangko gronge agangrikna a·bachengaha.
Tura-ona sokbaani ja·man kobor ra·timgipa manderangna talataniko on·angengon, onbatgipa gadangonin Congress dolko mangrakpilattaina gita BCC aro DCC-ni membor sakanti baksa sakprakprak agangrike, uamangni nangnikani aro agan-ku·pattianirangko ra·nasa uko AICC, Garo Hills-ona watataha ine Dr Tejavath parakataha.
District level, block level aro primary level-o gital committee-rangko songna nangenga ine janapatengon, iani bidingo DCC-ni president-ko songna gita AICC, dorgastorangko okamenga aro Congress membor sakantian, on·sogimin form-o gapate, iana dorgastoko galna man·gen ine Dr Tejavath parakataha.
Indake ong·engon, da·al Sukrobar salni 11:00 bajio, pilak DCC aro BCC-ni president general secretary aro delegate-rangkoba Tura-ni Congress Bhavan-ona re·bae, AICC-ni Observer Dr Tejavath-ko grongechina aro an·tangtangni gamchatgipa ku·pattianirangko on·atchina Congress dolni dilgiparang didiataha.
