SHILLONG: Mandeni janggina sal somoi dongja ine agana gitan Bristibar attamo, Shillong-ni Lok Sabha MP aro Voice of the People’s Party (VPP)-ni dilgipa Ricky AJ Syngkon, robol kal·e roengmitingo tanggitik saaniko man·e ga·akaha aro ja·mano ua, Shillong-ni Dr H Gordon Roberts Hospital-o a·gilsakko watangaha. Ua bilsi 54 ong·ahachim.
Koborko on·ani gitade, Bristibar attamo Shillong-ni MP Ricky Syngkon, an·tangni ripengskarang baksa Mawlai Mawiong kal·chakramo robol kal·e roengachim indiba rang·san ua ka·tongni saaniko man·enba ga·akgropaha.
Ga·aka bakan Syngkon-ko uni ripengrang, Jaiaw-o donggipa Dr H Gordon Roberts Hospital-ona ra·angaha aro doctor-rang, uko sanna gita jotton ka·beahachim. Indiba rasong gribee ua, Bristibar walni 8:42 bajimango a·gilsakko watangaha.
Shillong MP-ni tanggitik siangani koborko man·soa bakan a·dokni VPP-ni president Ardent M Basaiawmoit, Mawhati-ni MLA Charles Marngar, dingtang dingtang dolni dilgiparang aro East Khasi Hills District Administration-ni official-rangba hospital-ona re·angaha.
