AMPATI: Sukrobar salo, South West Garo Hills a·jani Deputy Commissioner (Supply) office, Shillong-ni Meghalaya State Food Commission baksa nangrime, National Food Security Act (NFSA)-ni bidingo Regional Camp-ko Ampati-o ong·atangaha.
Program-ko a·bachengatanio, South West Garo Hills a·jani Deputy Commissioner Anendya Raajsshre, rimchaksoani kattarangko aganangaha.
Ia tom·anio, Meghalaya State Food Commission-ni Chairman DP Wahlang, ia program-ko ong·atani bidingo talate on·angengon, ia Commission-ni mongsonggipa daitoara, mande sakantinan cha·ani bosturangko sokate on·na kamko ka·anian ong·a ine parakangaha. Ian gnigipa regional camp-ko ong·atani ong·enga aro iani ja·man apsan program-kon mikkang jao Shillong-o ong·atangskagen ineba Wahlang aganaha.
Ia Commission-ni kamrangko talate on·angkuengon, Food & Civil Supplies, Education aro Social Welfare department-ni ning·o ia commission, food security scheme-ni kamrangko nirokenga ine Wahlang parakataha. Ia ration system-ni ning·o, Antyodaya Anna Yojana (AAY) nokdangrang, jaantian kg 35 merongko man·enga aro Priority Household-rang, mande sakprakon kg 5 merongko indin man·enga ineba MSFC-ni Chairman parakataha.
Merong aro gipin cha·ani bosturangko hisap gnang sualchina aro namgipa bosturangko on·china Fair Price Shop (FPS)-rangko didiatengon, cha·ani bosturangko ra·anio maiba neng·nikanirangko man·genchimode District Grievances Redressal Committee-na report ka·china Wahlang, manderangko ku·pattiangenba, ia neng·nikanirangko committee namatna man·jagenchimode Commission-ona ra·angna man·a ine parakataha.
PM Poshan Scheme-ni ning·o, skulrangna salantian aro indin Mid-Day Meal-rangko on·enga aro skulrango me·su baganrangkoba dakatjolenga ineba ua aganaha.
Ia tom·anio, Meghalaya State Food Commission-ni Member Secretary IW Ingty-ba jinmana aganprakangengon, Commission-ni kamrangko aro bilrangko jinmana talate on·angaha.
Ia program-ko ong·atanio, Ampati, Tura, Williamnagar, Baghmara, Resubelpara aro Dadenggre-ni official-rangba E-KYC, NFSA, Ration Card, PDS aro uandakgipa kamrangni bidingo agan-talatanirangko on·angaha.
Ia tom·anio, Meghalaya State Food Commission-ni Member Mihshwa Tyngkan aro dingtang dingtang official-rangba dongpae bak ra·angtokaha.
Ia tom·anio, Ampati A·chik Cultural Society, Wangala chroke mesokanichi program-ko mikkim gnangbatataha aro ia tom·anio nambatgipa Fair Price Shop dealer-naba boksisko on·angaha.
