SWGH-o Wildlife division-ko kulichina sorkariko didia
SHILLONG: Garo Hills-o mitam manderang kawatterangko pale cha·na rim·engani a·sel da·o kawatterang gimaroroangengaha aro iani a·selan Garo Hills-ni pilak biaprangon chibrimrang jelroroskaengaha ine Sombar salo, Opposition dolni dilgipa Mukul Sangma, an·tangni jajrengchakaniko parakangaha.
Sombar salo, Assembly budget session-o chibrimrang jalbatrorobaengani gimin janapangengon, kawatterangko manderang pale cha·na rim·engani a·sel Garo Hills-o kawatterang komiroroangengaha aro iani a·selan chibrimrang jelbaroroskaengaha ine Sangma aganaha.
Garo Hills-o Wildlife division-rang chu·ongjaengani a·sel matburingrangko chel·chakanio kamrangko name ka·na man·jaenga ine janapatskaengon, da·o dipet South Garo Hills a·jani Baghmara-osan wildlife division donge, salgro jolrangchipakde matburingrangko chel·chakna man·jaenga ine Songsak-ni TMC MLA aganaha.
Matburingrangkosan chel·chaka ong·aigija matburing aro mandeni gisepo chagrongna nangani somoirango manderangna chel·chakaniko on·na man·na gita South West Garo Hills a·jao Wildlife division-ko kulichina gitaba Sangma didiangaha.
Ia kattarangna aganchakaniko on·angengon, sorkari office-rangko kulidapna sorkari kamrangko a·bachengatengaha aro ia office-rangko kulina sorkari sanction ka·ahaon, dingtang dingtang biaprango office-rang, beat house-rang aro range-rangko kulignok ine Chief Minister ku·rachakaniko on·angaha.
Garo Hills-o kawatterangko chel·chake rakkina gita ua an·tangan kamrangko ka·dilanggen ineba Chief Minister ku·rachakaniko on·angaha.
