SHILLONG: 2026-2027 bilsina Gross State Domestic Product (GSDP)-ni 3.5 percent-mang ong·gipa kror 2,672-ni deficit budget-ko Sombar salo, a·dokni Chief Minister Conrad K Sangma, Assembly-o parakataha.
Ia bilsini budget-ko Assembly-na mesoke on·angengon, ia bilsini budget-o chu·gimik receipt-rangara gong kror 32,000 ong·enga aro ianoni gong kror 26,583-de revenue receipt aro gong kror 5417-de capital receipt ong·enga ine Chief Minister parakataha.
Ra·srogipa tangka gong kror 5379-ko changale total receipt-ko gong kror 26,621-na hisapaha ine janapatengon, total expenditure-na gong kror 32,023-ko hisapenga aro ianoni gong kror 21,812-kode revenue expenditure-na aro gong kror 10,211-kode capital expenditure-na hisapenga ine Chief Minister parakataha.
Gong kror 2731-ni loan payment-ko changale, total expenditure-na gong kror 29,293-ko hisapenga ineba Chief Minister talate on·angaha.
Chief Minister-ni parakatani gitade, 2026-27 bilsio interest payment-na gong kror 1540-ko aro pension payment-na gong kror 1980-ko hisapenga.
“Tangka paisarangko gamani ja·man, gong kror 4771 kajinarangko gitchae a·dok man·na ka·dongenga aro gong kror 714-ni closing balance-ko man·na ka·dongenga,” ine Sangma aganaha.
Ia bilsio Climate Budget-na gong kror 5,572-ko aro Gender Budget-na gong kror 6,849-ko sorkari chamataha ineba Chief Minister parakataha.
2026-27 bilsini gisepo a·dokni GDP-na gong kror 76,320-ko hisapenga aro ian 2024-25 bilsioni 13.1 percent-chi bariani ong·enga ine janapatengon, ian 2028 bilsini gisepo GDP-ko gong kror 85,000-ona aro 2032 bilsini gisepo gong kror 1,35,000-na bariatna miksongani ong·enga ine Chief Minister aganaha.
A·doktangni kajinarangko gile man·ani ia bilsio gong kror 4226-ona tang·doangaha ineba ua aganaha.
Tamil Nadu a·dokni ja·man da·o Meghalaya a·dokan ta·rakbatsrange dal·roroenggipa a·dokrangoni gnigipa ong·aha ine janapatengon, bilsi gittamna COVID sajinmani somoio GSDP-ni dal·roroaniko 10 percent-mang ong·na sipile rakkina man·aha aro 2025 bilsio 12 percent-ni gita nominal growth-ko nikna man·aha ine Chief Minister parakataha.
“Meghalaya a·dok bimangni gita chonnaba gnang indiba chingni nangnikanirang namen dal·a aro ka·donggipa ong·a,” ine Sangma aganaha.
