SHILLONG: Garo Hills Autonomous District Council (GHADC) election-ko re·baenggipa April jani 10 tariko ong·atna tik ka·engon, ia election-o susana gita Sombar salo, Congress dolni sak 24 candidate-rangko skanggipa list-o parakataha.
Ia sak 24 candidate-rangko, Meghalaya Pradesh Congress Committee (MPCC)-ni president Vincent H Pala, District Congress Committee (DCC)-rangni recommend ka·anio pangchake ra·chakangaha aro ia sak candidate-rangara, Siju GHADC constituency-na Kartick R. Marak, Wagesik constituency-na Budhar M. Marak, Silkigre constituency-na Arjun S. Marak, Rongrikkimgre constituency-na Karak R. Sangma, Gasuapara constituency-na Sengrik M. Marak, Barenggapara constituency-na Gredit T. Sangma, Amongpara constituency-na Luckshwell M. Sangma, Tura constituency-na Prewil Ch. Marak, Dengnakpara constituency-na Sadhiarani M. Sangma, Boldamgre constituency-na Binvinchand D. Sangma, Zikzak constituency-na Premish S. Sangma, Betasing constituency-na Ajitav Koch, Rochonpara constituency-na Ripseng K. Marak, Asanang constituency-na Nonickha D. Momin, Balachanda constituency-na Tingku N. Marak, Batabari constituency-na Ruth Tamera A. Sangma, Raksamgre constituency-na Sengrak B. Sangma, Jengjal constituency-na Levastone T. Sangma, Rongrong constituency-na Dr. Tweel K. Marak, Bolsong constituency-na Brigady N. Marak, Damas constituency-na Timjim K. Momin, Kharkutta constituency-na George N. Sangma, Darugre constituency-na Walseng M. Sangma aro Rongrenggre GHADC constituency-na Denang T. Sangma ong·a.
Ia chang GHADC election-oba Congress dol, gimik dam 29 constituency-rangon susagen ine adita salrangna skangsan MPCC-ni president parakatahachim.
GHADC election-o susana tariaha ineba MPCC-ni president, an·tangni ka·dongchakenganiko parakataha.
“Election-o susana chinga pilakni gita tarisamsomanaha. Chingni manderang, dingtang dingtang biaprango kamrangko ka·enga aro chinga chu·sokgipa ong·na ka·dongenga,” ine Pala aganaha.
GHADC-o dam 30 seat-rang donga aro ia dam 30 seat-rangoni dam 29 seat-nade election-o susaatenba, seat damsanade, Executive Committee-ko rikna man·gipa party-rang, membor-ko nominate ka·rongaia ine nikna man·a.
