SRP-ko Expert Committee-ni ku·pattia gitan taridapgija donangkuna CM ku·monga

SHILLONG: Meghalaya a·dokni State Reservation Policy (SRP)-ko Expert Committee-ni report-o ku·pattigimin gitan taridapgija donangkuna a·dokni Chief Minister Conrad K Sangma aganaha.
Expert Committee-ni on·gipa report-na chakpaaniko on·angengon, gitcham see rakkianirangko nichenge, dingtang dingtang dolrang aro a·doko songdongenggipa manderang baksa chanchirimchenge aro kacharini kamrangkoba nichengesa, reservation policy-ko taridapgija donangkuchina Committee-ni report-o ku·pattianiko on·aha ine Chief Minister parakataha.
Reservation Policy-ni bidingo Assembly-o chanchirimanirangna aganchakaniko on·angengon, ia policy-ko gital dake nipiltaichina dabianiara gital dabiani ong·ja maina 1987 bilsirangon Khasi Students Union (KSU), 1972 bilsio tarigipa SRP-ko nipiltaichina dabiahani gimin file-ko tarie, gitcham chief secretary-ni ning·o dingtangmancha official committee-ko songaha indiba ua somoio maming ja·kurangko de·dapjaha ine Chief Minister parakataha.
Ia draft policy-ara mandeni jelbra jelsuaniosan pangchake tarigipa ong·ja indiba kam ka·giparang chu·ongjani gimin aro Scheduled Tribe baksana Scheduled Caste-rangni janggi tangani gadango komibatengani giminba niaha ine Sangma aganaha.
ST-rangna 85 percent reservation donani bidingo an·tangni jajrengchakaniko parakatengon, dingtang dingtang a·dokrango, dongimin 50 percent-na bate reservation donaniko kacharirangni den·galpilani gimin Chief Minister talate on·angaha.
Dingtang dingtang jatrangni nangnikani aro dabianirangko ma·sichakenga ine janapatskaengon, niam tarigiparangde, niam bidik aro aino pangchakesa ja·kurangko de·na nangao ga·akaia ine Chief Minister aganaha.
Opposition dolko dilgipa Mukul Sangma-ni agananina chakpaaniko on·angengon, ku·cholsan bakrime kam ka·anichisa 1972 bilsio Meghalaya a·dokko man·aha aro mikkangchiba apsan daken dingtang dingtang kamrango ku·cholsan ong·e kamrangko ka·angkuna ine Chief Minister, Assembly-ni membor-rangna gisik ra·attaianiko on·angaha.
Kamgri ong·e dongenggipa chadamberangni neng·nikanirangko janapangengon, “An·ching sorkarini kamrangosan pangchakaigija, an·chingni chadamberangba kamrangko nakatate on·skagiparang ong·na man·na gita bading chiwalani kamrangkoba mesoke on·na nanga,” ine Sangma aganaha.