SHILLONG: State Reservation Policy (SRP)-ni bidingo chanchirimaniara, dingtang dingtang jatrangna nangchakeaniko ra·bana amgipasa ong·a ine Reservation Policy-ko nipiltaina dabianio, dongimin niamrangko name nichina aro simsakchina gita Opposition dolni dilgipa Mukul Sangma didiangaha.
Assembly-o Reservation Policy-ni bidingo Expert Committee-ni ra·bagipa report-ni gimin chanchirimanio bak ra·angpaengon, Reservation Policy-ni bidingo batanggimin bilsirangonin Assembly-ni ning·o aro Assembly-ni a·paloba changni chang chanchirimaha indiba ian dingtang dingtang jatrangna nangchakegipa kamsa ong·ani gimin bang·bata changon membor-rangni giseposan chanchirimbataiaha ine Sangma aganaha.
Reservation Policy-ni bidingo dingtang dingtang sorkarirang, namen simsakesa ja·kurangko de·aha ine janapatengon, ia policy-o nangchakegipa mitam kamrangko kacharini gita niatani ja·mansa iako da·o ong·enggipa sorkari, chanchirimaniona ra·bataiaha ine Sangma aganaha.
“An·ching niam tarigiparang ong·e, dongimin niamrangko name nichengna nanga. Bang·a changon ian an·chingna namen neng·begipa kam ong·aha,” ine Sangma aganenba, Meghalaya a·dokko man·ani ja·man dingtang dingtang jatrangni namgnina ia policy-ko ra·gate on·aha ine a·dokni pagitchamrangko mittelpilangaha.
Ua somoio dingtang dingtang jatrangni gisepo nangnikanirang donggenchimoba a·doko songdongenggipa Khasi, Jaintia aro Garo jatrangni namgnina a·dokni dilgiparang, nambee ia policy-ko tarie on·aha ineba Sangma aganaha.
“An·ching statistics-o pangchake dongaigenchimode an·chingni jera ra·grikanirang bon·changjanaba gnang. Ua somoio pilakan apsan chanchirime tik ka·ani giminsa ia policy-ko ong·atna man·ahani gimin an·chingni gisepoba melianiko mesokna nangenga,” ine Opposition dolni dilgipa aganaha.
Niamrangko talbate ma·sie ra·na gita Article 16(4) aro Article(4B)-ko dingtang dake poraigija, Article 16(1) aro 16(2) baksasa apsan poraichina gitaba Sangma ku·pattiangaha.
Backlog aro roster system-ni bidingo janapatengon, Article 16(4B)-o gapatkugijagipa kamrangko reservation-na dongimin niamko pe·gija, mikkang bilsirangoba dingtang class dake ra·na cholko on·aha ine Sangma parakataha.
Meghalaya Public Service Commission (MPSC)-ni ong·atgipa a·dokni civil service porikkarango candidate-rangni chu·sokgipa ong·aniko janapatskaengon, open category-oba dingtang dingtang jatni chadamberang bang·en chu·sokna gita man·aha ine Sangma parakataha.
“Ian an·chingni chadamberangko reserved category-rangosan ong·aigija open category-oba susana man·a ine mesokano ong·a,” ine Sangma aganaha.
Jatsa jatgipin baksa ku·mong nangrimani, ma·sichakgrikani aro mande ra·grikani dongna nanga ine janapatengon, iani bidingo pilak membor-rangni gisepo chanchirimaniko ong·attaichina gita Opposition dolni dilgipa, Chief Minister-ko didiangaha.
