SHILLONG: Sorkarini kamko ka·na gita da·o a·doktangni ku·sikrangko, mongsongbate Khasi aro Garo ku·sikrangko man·giparang ong·na nangaha ine sorkarini niamko donangani ja·man MLA-rangnaba, sal 10 ba sal 15-ni Khasi aro Garo course-ko a·bachengatna nangengani gimin Bristibar salo, a·dokni Chief Minister Conrad K Sangma ku·pattianiko on·angaha.
Assembly-o chanchirimanirangna aganchakaniko on·angengon, “MLA-rangnaba sal 10 ba sal 15-ni crash course-ko ra·na man·genchimode nambegen maina Garo Hills-ni MLA-rang, Khasi ku·sikko skie ra·na man·gen aro Khasi-Jaintia Hills-ni MLA-rangba Garo ku·sikko skie ra·na cholko man·gen. An·chingan dilgiparang ong·e, iako dakanichi namgipa dakmesokani ong·gen,” ine Sangma aganaha.
District Selection Committee (DSC)-ni dingtang dingtang kamna porikkarangko ra·anio, Khasi aro Garo ku·sikko nangtelgipa ong·atna sorkarini tik ka·ahani gimin Trinamool Congress (TMC)-ni MLA Mizanur Kazi-ni jajrengchakaniko parakani ja·man Chief Minister, ia kattarangko aganaha.
DSC-ni dingtang dingtang kamrangna Khasi aro Garo ku·sikrangko nangtelgipa ong·atna tik ka·ahani gimin an·tangni jajrengchakenganiko parakatengon, Garo Hills-ni a·kawe jolrango songdongenggipa manderangde Khasi aro Garo ku·sikrangko name man·pagiparang ong·jani gimin ian jolni chadamberangna champengani gita ong·enga ine TMC MLA Dr Kazi, Khasi aro Garo ku·sikko skie ra·na cholrangko on·skachina aro chu·onga gita somoirangko on·china a·dok sorkariko didiangaha.
Iana aganchakaniko on·angengon, ian gipin jatrangko watchanggalna miksonganide ong·jaenga indiba sorkarini kamko ka·na re·baenggiparangde joltangni ku·sikko man·na nanggen inesa ong·enga ine Chief Minister talataniko on·angskaaha.
“Je manderangan sorkarini kamrangko ka·na dorgasto galenga, uamangde joltangni ku·sikrangko man·na nanggen ine miksonganiosa iako sorkari dakenga. Ian rakbegipa subject-ba ong·ja, agangrikna man·anikosan nangaia,” ine Sangma aganaha.
“Sorkario kam ka·giparang Garo aro Khasi ku·sikko aganna man·jaode, ian jolni manderangna dangdike on·anio kamrangko name ka·na man·jawa. Iano darangkoba miksonge dakenga ong·ja indiba manderangna dangdike on·anio ku·sikrangko man·na nanganikosan miksonga,” ineba ua aganaha.
Garo Hills-ni a·kawe jolrango bang·bata manderangan Garo ku·sikko namen aganna man·aia ine janapatengon, “Selsella aro gipin a·kawe jolrango ango ripengrang bang·en donga aro uamang pilakan Garo ku·sikko aganaia. Uni gimin iano maming neng·nikani dongjawa,” ine Chief Minister aganaha.
MLA-rangna Garo aro Khasi ku·sikrangko skina tik ka·aniko TMC-ni MLA Charles Pyngrope-ba an·tangni namnikpaaniko Garo ku·sikchi parakataha.
“Angaba ia chanchianiko namnikaha. Mittela,” ine Pyngrope Garo ku·sikchi aganon, Assembly-o jinma ka·dingtokaha.
