Candidate-rangna ST certificate-ko nangtelgipa dakna GHADC EC-ni ja·ku de·anina AHAM mittelata

TURA: District Council election-o susaenggipa candidate gimikna Scheduled Tribe (ST) Certificate-ko on·a nangtelaniko dakatenganichi constitutional-ni gita chanchiaha aro itihas dake iako Garo Hills Autonomous District Council (GHADC) parakataha.
2026 bilsini February 9 tariko Executive Commitee tom·ani somoio resolution-ko tariaha aro 2026 bilsini February 17 tariko Notification No. GHADC/GAD/NF/396/2012/104-A-o naiamni gita nakatataha. GHADC-na je General Election ba Bye Election-na susagipa sakantian nomination lekkako on·ani somoio Meghalaya sorkarini gita on·gipa ST Certificate-ko on·chapna nangtelaniko notice on·angaha.
Notice on·gipao parakatani gitade, ST certificate scrutiny ka·ani somoio tribal jat ine· sakkina mongsonggipa document dake ra·anggen. Returning Officer-rang aro Assistant Returning Officer-rang, certificate-rangko name dake nichina ge·etaha aro on·a man·gijagiparangkode election-ni niamni ning·o jegalako man·gipa ong·gen. Ia ge·etaniko da·on ja·rikanggen aro mikkangchi GHADC bilni ning·o ong·atgipa election gimikon ja·rikanggen.
Tribal jatni an·tang sorkari rikgipako dingtangataniona ra·bana ja·ku de·aniko bilakdapatenganina da·o Executive Committee ong·gipako A·chik Holistic Awakening Movement (AHAM) mittele aganangaha aro chanchianiko namnikpaaha. Constitution of India-ni Sixth Scheduled-ni mongsonggipa miksonganiko bilakdapatna ja·ku de·aha aro jatni bimingko, niamrangko aro Garo Hills-ni sorkari rikaniko naljokatgipa dake organisation aganangaha.
Meghalaya Gazette official-o notification-ko ta·rake jinmana u·iatchina Commissioner & Secretary, District Council Affairs (DCA), Meghalaya sorkariko AHAM mol·molangaha, jedakode chu·gimik niamni gita kam ka·angna man·a ge·etaniko mande jinmana u·iatna nangchongmota ine aganangaha.
A·dokni constitutional itihas-o bilakgipa ja·ku de·ani dake talatangaha. Tribal jatni bimingko chel·chakna, democratic-ko silroroatna aro namgnina kakket bichalko on·anio reform-ko chalaina ta·rakatan baksa kam ka·china authority-rangko AHAM didiangaha.