Health dept-o kam ka·giparangni chu·onggijaniko namatchina CAG didia

SHILLONG: Meghalaya a·dokni health department-o kam ka·giparang chu·ongjaengani a·sel neng·nikanirangko namatna gita ja·ku de·chakatchina India-ni Comptroller & Auditor General (CAG), Meghalaya sorkarina ku·pattianiko on·angaha.
2011 bilsini Census-o pangchake, a·doko mandeni jelbra jelsuani lak 29.66 ong·a aro ia manderangna dingtang dingtang gadango an·seng baljokaniko on·na gita a·dok sorkari, dam 10 Civil/District Hospital, damgni Maternal & Child Health hospital, damgni specialized hospital, dam 30 community health centre (CHC), dam 119 primary health centre (PHC) aro dam 467 sub-centre ba health & wellness centre-rangko kuliaha. 2023 bilsini June jaona kingkingde a·dok sorkarini ning·o medical college ba tertiary care hospital-rangba dongkujachim.
Indake ong·engon, CAG-ni compliance audit-ko ka·anio, 2016-17 aro 2021-22 bilsini gisepo, songni nokni aro block-ni gadangrango an·seng baljokani aro sanna bananirangko on·ani bidingo nipilangaha.
Seoka man·gipa district dambrio audit ka·on, dam 22 private health centre ba nursing home-rangoni dam 19-kode licence gri chalaienga ine ma·sina man·aha aro sorkari health centre-rango kam ka·enggipa sak 17 doctor-rang, Meghalaya Nursing Home Rules 2015-ko pe·e, private health centre-rangoba kam ka·enga ine ma·sina man·aha.
A·dokni niamrang baksa nisusaon, seoka man·gipa CHC damchet-o 60 percent-ni doctor-rang, 7 percent-ni gita nurse-rang, 58 percent-ni gita paramedical staff aro PHC damcheto 50 percent doctor-rang, 4 percent nurse-rang aro 4 percent-ni gita paramedical staff chu·ongjaenga ine nikna man·aha.
2022 bilsini August-September jao joint verification-ko dakon, seoka man·gipa CHC-rango 16-oni 100 percent-ni gita bosturang chu·ongjaenga aro PHC-rangoba 20 percent-oni 58 percent-ona bosturang chu·ongjaenga ine ma·sina man·aha.
2017-18 bilsirangoni 2021-22 bilsirangona CHC aro PHC-rango, kam ka·giparang chu·ongjani a·sel aro nangchongmotgipa sam aro bosturang dongjani a·sel, register ka·gipa sak 11,32,394-oni sak 13,893-kode gipin biaprangona refer ka·atna nangaha ineba nikna man·aha.
Shillong aro Tura0o kror 5.18 koros ong·e rikgipa 100 bed prefab centre-rangko, Shillong-ode chirang chu·ongjani gimin aro Tura-oba bijoli aro chirang dongkujani gimin jakkalgija donchipaha ineba CAG-ni audit ka·anio ma·sina man·aha.
Kror 1.77 koros ong·e rikgipa damchet Ayush centre-rangko, 2019 bilsini May ja aro 2020 bilsini December jani gisepo pakwatmanaha indiba ia centre-rangko 2022 bilsini September jaona kingkingan jakkalchipkujachim.
An·seng baljokaniko on·aniara a·dokni manderangna namen nangchongmotgipa ong·ani gimin iandake kam ka·giparangni chu·onggijaniko a·dok sorkari namatna nangchongmota ine CAG-ni report-o janapaha.