SHILLONG: Meghalaya-n Ri-Bhoi district-o Hynniewtrep National Liberation Council (HNLC) bobil dolo niamgri chadamberangko rakkienganina aro IED-chi ka·mikenatanina sakgni manderangko chel·chakgipa dol rim·aha.
Koborrangko man·soe Ri-Bhoi District Executive Force aro Anti-Terrorism Squad-ni gita apsan nangrime kam ka·anichi sakgni manderangko rim·aha. February 23 tariko Nongpoh-ni Pahamkapong-o apsan nangrime kam ka·gipa dol tang·gitik am·sandianiko dakaha aro bilsi 35 ong·gipa Benjamin Sohtun-ko rim·aha. Nisan dona social media-ko jakkalenganina aro chadamberangko bobil dolo rimnapenganina dosi pote uko rim·aha.
Bobil dolo uni jak dongpaaniko aro uo donggipa bosturangko sing·sandianiko dakani somoio Sohtun police-na parake on·aha.
Sing·sandianiko dakani somoio, sing·sandigiparang chanchichipgipa sakgipin bilsi 23 ong·gipa Jenesis Sohkhwai-ko Patharkamah-ni Umsohbar songoniko February 26 tariko rim·aha. Police-ni parakatani gitade, Sohkhwai Sohtun baksa IED bomarangko tariengachim, district-o chel·chakgipa dolko makete donangaha.
Bharatiya Nyay Sanhita-ni section 113(3), 147 aro 148-ni ning·o Case No. 12(2) 2026-ni ning·o Nongpoh Police Station-o mamlako segatangaha. Niamgri kam ka·gipao bakrimgipa gipin manderangko rim·na aro sandina kam ka·anganio am·sandianiko dakapangkuenga ine official-rang parakataha.
