New Shillong-o metre 123 chugipa Monolith Towers-ko rikgen
SHILLONG: Meghalaya a·doko songdongenggipa manderangna janggi tangani cholrangko on·an baksana songni nokni economy-ko tang·doatanio a·dok sorkari, dingtang dingtang biaprango adita tourism project-rangko a·bachengatenga ine a·dokni Chief Minister Conrad K Sangma parakataha.
Ia project-rangni gimin talataniko on·angengon, Mawkhanu jolo donggipa New Shillong-o rikna sienggipa Monolith Towers, metre 123 ong·e chugen aro ian a·songo Statue of Unity-ni ja·man chubatsranggipa bimangrangoni gnigipa ong·gen ine Sangma aganaha.
Ia Monolith Towers-o elevator-rang, restaurant-rang, kosako glass-ni walkway aro dingtang dingtang cholrangko done, gipin biaprangoni re·baenggipa manderangna damsa niani biap gita tarigen ineba Chief Minister parakataha.
Burj Khalifa gita niksenggipa biaprang baksa tosusaatengon, ia biapo, Meghalaya a·dokni daka rikanirangko mesokan baksana walni somoirango laser light show-rang donggen ine Chief Minister parakataha.
INI Design Studio-ni design ka·gipa Monolith Tower Complex-ko acre 213.8 ong·gipa a·ao rikgen aro ian Khasi aro Jaintia monolith-rangni bimangrangko mesokani ong·gen.
Chief Minister-ni parakatani gitade, ia Monolith Towers-ko rikaniara, a·dokni dingtang dingtang biaprango gital tourism zone-rangko tarianio, Shillong songjinmani apchangket ong·aniko komiatna kam ka·ani bak gita mingsa project ong·enga.
Gipin project-rangni gimin janapatskaengon, kror 51-ni skywalk, Mawkdok-o tourist hub, Mandalgre-o kror 30-ni Tribal Heritage Experience Centre, Sakal A·duma songo eco-resort project aro Mawsynram-o Rain & Bamboo Museum-ko rikanian ong·enga ine Chief Minister parakataha.
